विराटनगर, १२ असोज । मोरङको कटहरीमा विद्यालयकै सामुन्ने राजनीतिक दलले कार्यक्रम राख्दा दिनभर पठनपाठन प्रभावित हुने गरेको छ । विद्यालयलाई शान्ति क्षेत्र भनिएपनि राजनीतिक दलहरु गैरजिम्मेवार बन्दा पठन पाठन प्रभावित हुने गरेको पाइएको छ ।

मोरङको कटहरी गाउँपालिका–४ स्थित एक विद्यालयमा राप्रपाले गरेको कार्यक्रमले विद्यार्थीको पढन पाठननै विथोलिएको हो । कटहरी–४ खयरबना स्थित आधारभुत विधालयकै सामुन्ने राप्रपाले कार्यक्रम राख्दा आइतबार विद्यार्थीहरुले पढ्न नपाएको व्यवस्थापन समितिका अध्यक्ष दिपेन्द्र ऋषिदेवले बताए ।

उनका अनुसार राप्रपाले ठुलो आवाजमा माइक बजाउँदै कार्यक्रम गर्दा सो दिन विद्यार्थीहरुले पढ्न पाएनन् । दिनभर ठुलो आवाजसहितको कार्यक्रमले गर्दा विद्यालय समय अवधिभर विद्यार्थीले पढ्न नपाएका हुन् । ‘कार्यक्रम गर्नेबारे विद्यालयलाई कुनै जानकारी थिएन । विद्यालयमै जोडेर माइकले ठुलो–ठुलो आवाज निकालेर कार्यक्रम गर्दा डिस्टर्भ भएर विद्यार्थीले पढ्न पाएनन् ।’ अध्यक्ष ऋषिदेवले भने,‘कोरोनाले धेरै महिना बन्द भएर बल्ल स्कुल लाग्न थालिरहेको बेला जबरजस्ती कार्यक्रम गर्दा विद्यार्थीको एक दिन त्यसै खेर गयो ।’

अध्यक्ष ऋषिदेवका अनुसार आइतबार विद्यालय लागिरहेको समयमा राप्रपाले कार्यक्रम गरेको थियो । सो विद्यालयमा अधिकांश दलित समुदायका बालबालिका अध्ययनरत छन् । ८ कक्षा सम्म पढनपाठ हुने सो विद्यालयमा ५ सय २१ विद्यार्थी अध्ययनरत रहेको व्यवस्थापन समितिका अध्यक्ष ऋषिदेवले जानकारी दिए ।