एजेन्सी, बैशाख १५-भारतमा लकडाउन जारी रहे पनि कोरोना भाइरस संक्रमितको संख्या भने निरन्तर बढिरहेको छ ।वर्ल्डोमीटरका अनुसार गएको २४ घटामा मात्रै त्यहाँ १ हजार ६ सय ७ जना संक्रमित थपिँदा ५६ जनाले ज्यान गुमाएका छन् ।

योसँगै भारतमा कुल संक्रमितको संख्या २७ हजार ८ सय ९० पुगेको छ । त्यहाँ सोमबार बिहानसम्म ८ सय ८१ जनाले ज्यान गुमाएका छन् ।भारतमा हालसम्म साढे ६ हजार व्यक्ति उपचारपछि घर फर्किएका छन् । हालसम्म त्यहाँ ६ लाख २५ हजार बढी व्यक्तिमा कोरोना परीक्षण भएको छ ।

दक्षिण एसियाको अर्को बढी कोरोना प्रभावित पाकिस्तानमा संक्रमितको संख्या १३ हजार ३ सय नाघ्दा २८१ जना जनाले ज्यान गुमाएका छन् । पाकिस्तानमा आइतबार ६ सय संक्रमित थपिँदा १२ जनाले ज्यान गुमाए । सोमबार बिहानसम्म पाकिस्तानमा झण्डै ३ हजार संक्रमित निको भइसकेका छन् ।

बंगलादेशमा ५ हजार ४ सय, अफगानिस्तान १ हजार ५ सय, श्रीलंकामा ५२३, माल्दिभ्समा २१४, नेपालमा ५२ र भुटानमा ७ जनामा कोरोना संक्रमण पुष्टि भएको छ ।

गत वर्षको डिसेम्बर अन्तिम साता चीनको वुहान शहरमा देखिएको कोरोना हालसम्म विश्वका २१० देश प्रभावित भइसकेका छन् । सोमबार बिहानसम्म यो भाइरसबाट २९ लाख ९४ हजार व्यक्ति संक्रमित भएका छन् । जसमध्ये ८ लाख ७९ हजार व्यक्ति निको हुँदा २ लाख ६ हजार संक्रमितको भने मृत्यु भएको छ ।