विराटनगर, असार १०–प्रदेश १ का सामाजिक विकास मन्त्री जीवन घिमिरेले कोरोना नियन्त्रणमा आउँदै गएको बताएका छन् । पछिल्ला दिनहरुमा देखिएको संक्रमण भन्दा पनि निको भएर जानेको संख्या बढ्दै गएको उनले बताए । प्रदेश सरकारले कोरोना जित्दै गएको मन्त्री घिमिरेले दावी गरे ।

प्रदेश १ को समुदायस्तरमा देखिएको संक्रमण नियन्त्रणमा आएको र अहिले देखिएको संक्रमण क्वारेन्टाईनमा मात्र भएकाले चाडै नियन्त्रणमा आउने उनले विश्वास व्यक्त गरे ।

झापाको शिवसताक्षी नगरपालिकाको छैठौं नगरसभाको बुधबार उद्घाटन गर्दै मन्त्री घिमिरेले सो कुरा बताएका हुन् । मन्त्री जीवन घिमिरेले बजेट निर्माण भन्दा पनि कार्यन्वयनमा जोड दिनुभएको छ । उनले निर्माण गरिएको बजेट पूर्ण कार्यन्वयन हुनेमा विश्वास व्यक्त गरे । उनले स्थानीय तहहरु सम्बृद्धिको बाटोमा अघि बढ्न जरुरी भएको बताए ।

अहिले वडा–वडामा विकास निर्माणका कार्यहरू भैरहेपनि त्यत्ति मै सन्तोष मान्ने अवस्था नभएको भन्दै उनले भने,‘ अझ सशक्त ढंगले समृद्धिको बाटोमा अघि बढ्न जरुरी छ ।’ स्थानीय तहरुले बजेटका लागि आफ्नै श्रोतहरुको विकास गर्नुपर्नेमा मन्त्री घिमिरेको जोड छ ।

जनप्रतिनिधिहरुले गर्ने काम लुकाएर लुक्न नसक्ने भएकाले आचरण शुद्ध राखेर काम गर्न उनले सुझाव दिए । उनले भने,‘ जनप्रतिनिधि खुल्ला किताब हो, जनप्रतिनिधिले गरेको क्रियाकलाप लुकाएर लुक्न सक्दैन , कुनै न कुनै बेला बाहिर आउँछ ।’ राम्रो काम गर्दा पनि नियोजित विरोधहरु आउन सक्ने भएकाले विरोध भयो भन्दैमा काम नछाड्न उनले आग्रह गरे । जनताको नजरमा उत्तीर्ण हुने चेष्टा राखेर काम गर्नुपर्ने मन्त्री घिमिरेको भनाई छ ।