काठमाडौं, ३ साउन-नेपालमा शनिबार मात्रै ५७ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयको कोरोनासम्बन्धी नियमित पत्रकार सम्मेलनमा डा. जागेश्वर गौतमले देशका विभिन्न ठाउँमा गरिएको पीसीआर परीक्षणका क्रममा ५७ जनामा मात्रै कोरोना पुष्टि भएको जानकारी दिएका हुन् ।

उनका अनुसार नेपालमा सक्रिय संक्रमितको संख्या ५ हजार ८२५ रहेको छ । उनीहरूको देशका विभिन्न स्थानमा रहेका आइसोलेसनमा राखेर उपचार गरिरहेको स्वास्थ्य मन्त्रालयले जनाएको छ । त्यस्तै, नेपालमा कुल संक्रमितको संख्या १७ हजार ५०२ पुगेको छ ।

शनिबार थप १०३ जनाले कोरोना भाइरसलाई जितेर घर फर्किएका छन् । अहिलेसम्म ११ हजार ६३७ जना कोरोना संक्रमण मुक्त भएको स्वास्थ्य मन्त्रालयको तथ्यांक रहेको देखाएकोछ । नेपालमा अहिलेसम्म ६६.१२ प्रतिशतले कोरोना भाइरसलाई जितेका छन् ।

पछिल्लो २४ घण्टाको अवधिमा ३ हजार ३३१ जनाको पीसीआर विधिबाट कोरोना परीक्षण गरिएको स्वास्थ्य मन्त्रालयले जनाएको छ । त्यस्तै, २३ हजार २७५ जना देशका विभिन्न स्थानमा स्थापना गरिका क्वारेन्टाइनमा रहेका छन् । कोरोना संक्रमण भएर देशका विभिन्न स्थानका आइसोलेसनमा उपचार गराइरहेका व्यक्तिहरूको संख्या ५ हजार ८२५ रहेको छ ।