विराटनगर । विराटनगर महानगरपालिकामा पहिलो पटक वडास्तरमा गाउँघर क्लिनिकको सेवा विस्तार गरिएको छ । सेवाको विस्तार विराटनगर ८ बाट गरिएको हो ।

विराटनगर ८ मा प्रत्येक महिनाको ९ र १० गते गाउँघर क्लिनिकको सेवा प्रवाह शुरु गरिएको वडाध्यक्ष राम पोखरेलले जानकारी दिए । जनतालाई घर सेवा पुर्याउने लक्ष्य अनुसार लक्षित वर्गलाई पायक पर्ने स्थानमा महिनामा २ पटक सेवा शुरु गरिएको हो । सेवाग्राहीको चाप हेरेर थप सेवा उपलब्ध गराउने वडाध्यक्ष पोखरेलले प्रतिबद्धता व्यक्त गरे । उनले घर पायकै सेवा शुरु गरिएकाले सेवालिन वडावासीमा आग्रह गरेका छन् ।

वडा नंं ८ का स्वागतम् चौक, बलुवाही, अशोक चौक, रेल्वेपारि र अमरटोलका बासीन्दाहरुलाई लक्षित गरि सेवा शुरु गरिएको वडाध्यक्ष पोखरेलले बताए ।
‘गाउँघर क्लिनिक मार्फत प्रदान गरिने सेवाहरु घर–घरमा पुगेर स्वास्थ्यकर्मीले दिने छन् ,’ उनले भने । सेवा शुभारम्भका दिन मंगलबार ४० बालबालिकाले नियमित खोपको सेवा गाउँघर क्लिनिक मार्फत पाएको उनले जानकारी दिए ।

विराटनगर महानगरपालिकाका स्वास्थ्य महाशाखा प्रमुख हैदर अलिले महानगरपालिकाले वडा स्तरबाट पहिलो पटक सेवा शुरु गरेको बताए । लक्षित वर्गलाई पायक पर्ने गरि सेवा शुरु गरिएको उनले बताए । एकै ठाउँमा सेवाग्राहीहरुले धेरै सेवा पाउने उनको भनाई छ ।