फलामले घोचेर घाइते पारी टिपरले किचेर दीलिपको हत्या - News Birat

फलामले घोचेर घाइते पारी टिपरले किचेर दीलिपको हत्या

न्यूज विराट

जनकपुर, पुस २७–शुक्रबार बिहान हत्या गरिएका धनुषाका दिलीप भन्ने ओम प्रकाश महतोको हत्या प्रकरणमा नयाँ ट्विस्ट आएको छ । जिल्ला प्रहरी कार्यालय धनुषाले गएराति पत्रकार सम्मेलन गरी ४ जनालाई सार्वजनिक गरेको छ । दिलीप हत्या प्रकरणमा संलग्न भएको आरोपमा ४ जनालाई पक्राउ गरी सार्वजनिक गरिएको हो । प्रारम्भिक अनुसन्धानबाट दिलीपलाई पहिला फलामको लिभरले कोंखामा घोचेर घाईते पारी सुताएर माथिबाट ट्रिपर चलाएको प्रहरीले जनाएको छ। धनुषाको मिथिला नगरपालिका–५ का राम जीवन महतोका २४ वर्षीय छोरा दिलीप खोलाबाट चोरी निकासी गरी गिट्टी बालुवा उत्खन्न गरिरहेको खबर पाएलगत्तै रोक्न गएका थिए ।

उनलाई ना ७ ख ६४१३ नम्बरको ट्रिपरले किचेर हत्या गरेको खुल्न आएको छ । उनलाई कर्तव्य ज्यान गरी हत्या गरेको कसुरमा ४ जनालाई पक्राउ गरी सार्वजनिक गरेको छ । पक्राउ पर्नेहरुमा त्यही खोलामा संचालनमा रहेको चुरियामाई बालुवा प्रशोधन केन्द्रका संचालक २७ वर्षीय विपिन कुमार महतो, ट्रिपर चालक महोत्तरी बर्दिवास नगरपालिका–९ का ३४ वर्षीय मुनिन्द्र महतो, अनटेस्ट लोडर चालक बर्दिवास नगरपालिका–२ का २४ वर्षीय जितेन्द्र कुमार महतो र मिथिला नगरपालिका–२ का २७ वर्षीय रोशन कुमार यादवलाई पक्राउ गरी अनुसन्धान प्रक्रिया अगाडी बढाएको पत्रकार सम्मेलनमा धनुषाकाप्रहरी उपरीक्षक रमेशकुमार वस्नेतले जानकारी दिएका छन् । दिलिपको शुक्रबार बिहान करिब ४ बजे औरही खोलामा हत्या गरेको अवस्थामा शव फेला परेको थियो । भारतको भोपालमा मेकानिकल इन्जिनियरिङको अन्तिम वर्षमा अध्ययनरत दिलीप १६ पुसमा घरविदामा आएका थिए ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles