विराटनगर, ३ फागुन । विभिन्न ६ वटा पार्टीले भोली गरेको नेपाल बन्दलाई प्रभावहीन बनाउन गृह मन्त्रालयले निर्देशन दिएको छ । एमसीसीको विरोधमा बन्दको आह्वान गरेपछि गृह मन्त्रालयले शान्ति सुरक्षा कायम गर्न मातहतका निकायलाई सर्कुलर गरेको हो ।

मन्त्रालय अन्तरगतको शान्ति सुरक्षा तथा अपराध नियन्त्रण शाखाले नेपाल प्रहरी, सशस्त्र प्रहरी र राष्ट्रिय अनुसन्धान विभागलाई सबै जिल्लाको समग्र शान्ति सुरक्षा र सुव्यवस्थालाई चुस्त दुरुस्त बनाउन निर्देशन दिएको हो ।

गृहले बन्दमा कानुन विपरितका गतिविधि हुन नदिन उच्च सतर्कता र निगरानी बढाउन मातहतका निकायलाई निर्देशन दिएको हो ।
बन्दको हल्लासँगै भोली विराटनगरका शिक्षण संस्थाहरु पनि बन्द रहने भएका छन् । विराटनगरका अधिकाश स्कुल कलेज भोलि बन्द हुने भएको हो । स्कुल तथा कलेजले भोली विदा दिएका छन् ।

अमेरिकी सहायता परियोजना एमसीसीको विरुद्धमा विभिन्न छ वटा कम्युनिष्ट पार्टीले भोली नेपाल बन्दको घोषणा गरेका छन् । नेपाल कम्युनिष्ट पार्टी, देशभक्त गणतान्त्रीक मोर्चा नेपाल, बैज्ञानिक समाजवार्दी पार्टी, नेकपा (क्रान्तिकारी माओवादी), नेकपा र नेकपा माओवादी केन्द्र समाजवादीले संयुक्तरुपमा नेपाल बन्दको घोषणा गरेका हुन् ।

राष्ट्रघाती एमसीसी सम्झौताको विरुद्धमा भोली नेपाल बन्द गरौँ भन्ने नारासहित पार्टीहरुले बन्दको आब्हान गरेका हुन् । सोही बन्दलाई मध्यनजर गर्दै शान्ति सुरक्षा कायम राख्न गृहमन्त्रालयले मातहतका निकायलाई निर्देशन दिएको हो ।