विराटनगर, २३ कात्तिक । नेपालीहरुका दुई ठूला चाड दसैं र तिहार सकिएसँगै अहिले अर्को महत्वपूर्ण पर्व छठको चटारो सुरु भइसकेको छ । अहिले विराटनगर बजारमा छठ पर्वका लागि आवश्यक सामाग्री किन्नेहरुको भिड बढेको छ ।

खास गरी तराई मधेसका जिल्लाहरुमा छठ पर्व धुमधामका साथ मनाउने गरिन्छ । छठ पर्वको मुख्य दिन आउनै लागेकाले अहिले मानिसहरु छठको तयारीमा जुटेका छन् ।

विपन्नदेखि सम्पन्नहरु समेत आ–आफ्नो गच्छे अनुसार छठ पर्वका लािग किनमेलमा व्यस्त छन् । अहिले विराटनगर बजारमा समेत छठको किनमेल गर्नेहरुको निकै भीड लागेको छ ।

यतिबेला बजारमा छठका लागि आवश्यक सामाग्रीहरु कोनिया, ढाकी, केरा, नरिवल, भोगटे, माटाका घैला, पाला लगायतका सामाग्री किन्नेहरुको भीड देखिन्छ । यता सर्वसाधारणले भने यी सामाग्रीहरुको विक्रि बढेसँगै मूल्य समेत बढेको गुनासो गरेका छन् ।

यस्तै छठमा माटाबाट बनाइएका सामाग्रीहरुको समेत विक्रि बढ्ने गरेको छ । छठमा खासगरी माटाको घैंटो, दीप, ढकना, हात्ती, सरवा लगायतका समाग्रीको किनबेच हुने गर्दछ ।

तर यी सामाग्रीको समेत मूल्य निकै बढेको छ । यसबर्ष सिमित मात्रामा छठका सामाग्री भएकाले मूल्य बढेको व्यापारीहरुको भनाई छ ।यतिबेला विराटनगरका बजारहरु छठका सामाग्रीले भरिभराउ भएका छन् ।

यतिवेला छठ पर्वकै लागि प्रयोग गरिने विभिन्न फलफुलको समेत विक्रि बढेको छ । छठमा प्रसादका रुपमा प्रयोगहुने भोगटे (होक्से), केराको घारी, नरिवल, उखु, वेसार, अदुवालगायतका फलफुलको समेत विक्रि बढेको छ । अन्य समयमा भन्दा छठमा पुजाका लागि ति सामाग्रीको खपत हुने भएकाले व्यपारीहरुले ति सामाग्रीहरुको मुल्य आफुखुशि बृद्धि गरेका छन् । अन्य समय भन्दा ३ गुढाा भन्दा बढी मुल्य पर्ने गरेको श्रद्धालु भक्त जनहरुले गुनासो गरेका छन् ।

विराटनगरको गुद्री बजार छेउको सडकमा ब्यापारीहरुले पसल थापेर छठका सामाग्री विक्रि गर्ने गरेका छन् । छठ पर्वमा खासगरी गाउँघरमा उत्पादित सामाग्रीबाटै निर्माण गरिएका सामाग्रीहरुको प्रयोग गर्ने गरिएको छ । जसका कारण छठ पर्वले सँस्कृति संरक्षणका साथै ग्रामिण भेगका जनताको अर्थोपार्जनलाई समेत सघाइरहेको छ ।

खोला र जलाशय सरसफाइमा तिब्रता
सुर्य भगवान(छठि माता) को उपसना गरेर मनाइने यो पर्व खोला, नदी, पोखरी तथा जलाशयहरुमा गएर पुजा आराधना गरिने भएकाले जालाशयहरुमा ठाउँ छानेर सरसफाई गर्ने क्रम बढेको छ ।

वर्षदिनभरी फोहरमैलाले दुर्गन्धीत नदीनाला तथा जलाशयहरुमा घाट निर्माण गर्नका लागि सरसफाई सुरु गरिएको विराटनगरका अनिल कामतले बताए । उनले घाटलाई बेहुलीझैँ सिंगारिने र पुजा आराधना गरिने भएकाले सरसफाई गरेर शुद्ध पारिने गरेको बताए ।

छठ पर्वका लागि विराटनगरमा यतिबेला सिंघिया खोला, सुनसरी–मोरङ सिँचाई आयोजनाको नहर, पोखरीहरुमा छठ पूजाका लागि ठाउँ छानेर सरसफाई तिब्र पारिएको छ । छठ पर्वको अवसरमा खोला, नदी, पोखरी तथा जलाशयहरुमा उल्लेख्य भीड लाग्ने गरेको छ ।