काठमाडौं, १ असार-रुकुम चौरजहारीको सोती घटनामा स्थानीय जनप्रतिनिधिकै संलग्नता रहेको खुलेको छ । १० जेठमा रुकुम पश्चिमको चौरजहारी गनरपालिका–८ को भेरी नदीमा ६ जनाको ज्यान जाने गरी भएको हत्या प्रकरणमा स्थानीय जनप्रतिनिधिकै संलग्नता रहेको खुलेको प्रहरीले जनाएकाे छ ।
उक्त घटनामा जाजरकोट भेरी नगरालालिकाका नवराज विकसहित उनका ६ जना साथीको मृत्यु भएको थियो । चौरजहारीकी सुस्मा मल्लसँग नवराजको प्रेम सम्बन्ध रहेको र विवाह गर्न रुकुम पुग्दा उनीहरूको हत्या गरेको भन्दै पीडित परिवारले सोती गाँउका २९ जनाविरुद्ध प्रहरीलाई किटानी जाहेरी दिएका थिए ।
सोती घटनामा गृह मन्त्रालयले समेत छानबिन समिति बनाएर घटनाको अनुसन्धान गरेको थियो । गृहको छानबिन समितिले सोतीका वडाअध्यक्ष डम्बरबहादुर मल्लले नै युवतीको घरमा पुगेका नवराज विकसहितका युवालाई लखेटेको उल्लेख गरेको छ ।
गृह मन्त्रालयका सहसचिव जितेन्द्र बस्नेतको नेतृत्वमा घटना छानबिन समिति गठन गरेको थियो । आइतबार मात्रै रुमुक प्रहरीले वडा–८ का अध्यक्ष डम्बरबहादुर मल्ललगायत ३४ जनाविरुद्ध कर्तव्य ज्यान, जातीय भेदभाव, ज्यान मार्ने उद्योगमा मुद्दा दर्ता गरेको छ । त्यस्तै सरकारले देवेन्द्र पौडेलको नेतृत्वमा संसदीय छानबिन समितिसमेत गठन गरेको छ । संसदीय छानबिन समितिले अहिले काम गरिरहेको छ ।
