विराटनगर, १६ माघ-नेपाल कम्युनिस्ट पार्टी (नेकपा) को प्रचण्ड-माधव नेपाल समूहका अध्यक्ष पुष्पकमल दाहाल प्रचण्डले प्रधानमन्त्री केपी शर्मा ओली प्रतिक्रियावादी शक्तिको एजेन्ट बनेको आरोप लगाएका छन् ।

प्रचण्ड-नेपाल समूहले मोरङको विराटनगरमा शुक्रबार आयोजना गरेको प्रदेशस्तरीय विरोधसभालाई सम्बोधन गर्दै अध्यक्ष प्रचण्डले प्रतिनिधिसभा विघटन गरेर प्रधानमन्त्री ओलीले आफू प्रतिक्रियावादी शक्तिको एजेन्ट भएको पुष्टि गरेको आरोप लगाएका हुन् ।

प्रचण्डले प्रधानमन्त्री ओली प्रतिक्रान्तिकारीको गोटी बनेको पनि बताए । उनले ओलीले प्रतिनिधिसभा नभएर संविधान नै विघटन गरेको आरोप पनि लगाए ।

प्रचण्डले प्रधानमन्त्री ओलीले  संसद विघटन गरेर जनताको अधिकारमाथि हमला गरेको पनि बताए ।  प्रचण्डले पार्टी एकता ओलीले नभएर आफूले गरेको पनि दाबी गरे ।

प्रधानमन्त्री केपी शर्मा ओलीलाई श्री ३ को संज्ञा दिएका छन् । प्रचण्ड-नेपाल समूहले मोरङको विराटनगरमा शुक्रबार आयोजना गरेको प्रदेशस्तरीय विरोधसभालाई सम्बोधन गर्दै अध्यक्ष प्रचण्डले जनता सडकमा ओर्लिसकेकाले श्री ३ केपी ओलीलाई घुँडा टेकाएरै छोड्ने बताएका हुन् ।

‘केपी ओलीको खुट्टी कत्रो छ मैले देखेरै आएको छु, ‘ उनले भने, ‘अब जनताको बलमा श्री ३ ओलीलाई घुँडा टेकाएरै छाड्छौं । ‘ प्रचण्डले प्रधानमन्त्री ओलीलाई इतिहासमा जनताले हिटलरका रूपमा सम्झिने बताए । ‘इतिहासले नायक र खलनायकलाई पनि सम्झिन्छ,’ प्रचण्डले भने, ‘ जनताले ओलीलाई  हिटलरका रूपमा सम्झिनेछन् ।’

प्रचण्डले प्रधानमन्त्री ओली बेइमान र ध्रुत रहेको आरोप पनि लगाए । उनले प्रधानमन्त्री ओलीका पछाडि राजा महाराजाका धुपाउरेहरु मात्रै रहेको बताए ।

उनले छोराछोरीलाई बन्दुक बोकाएर हिँड्नु के मेरो दोष हो भन्दै प्रधानमन्त्री ओलीलाई प्रश्न गरे । ‘ छोराछोरीलाई बन्दुक बोकाएर हिँडे के यो मेरो दोष हो ? ,’ ओलीलाई प्रश्न गर्दै उनले भने, ‘म नपुंशक भइन के मेरो दोष हो ? कि धर्म छोराछोरी भन्दै कोचाउने चाहिँ ठीक हो ? कि ७० करोड भ्रष्टाचार गर्नेलाई बचाउने सुशासन हो ?’