विराटनगर, १० भदौ–समुदायस्तरमा कोरोना भाईरसको संक्रमण फैलिन नदिन दक्षिणपूर्वी मोरङकास्थानीयतहले एकरुपता कायम गर्दै आगामी भदौ १७ गतेसम्मका लागि बन्दाबन्दीलाई निरन्तरता दिने भएका छन् ।

मोरङको रंगेली नगरपालिकामा बसेको दक्षिणी हुलार्की राजमार्ग अन्तर्गतका सवै ६ वटै स्थानीयतहको संयुक्त बैठकले केही खुकुलो बनाउँदै बन्दाबन्दीलाई निरन्तरता दिने निर्णय गरेको हो ।

रंगेलीका नगरप्रमुख दिलिप बगडियाको अध्यक्षतामा दक्षिणी मोरङका कटहरी, धनपालथान, जहदा गाउँपालिका, रंगेली, सुनवर्षी र रतुवामाई नगरपालिकाको संयुक्त बैठकले सवै पालिकामा केही खुकुलो पार्दै एकरुपता काम गर्नेगरी बन्दाबन्दीलाई निरन्तरता दिने निर्णय गरेको हो ।

यसअघि ती पालिकाहरुमा भदौ १० गते राती १२ बजेसम्मका लागि बन्दाबन्दी घोषणा गरिएको थियो । बैठकले सो समय अवधिभर सवै पालिकामा स्वाथ्य सुरक्षा मापदण्ड पालना गराएर विहन ६ बजेदेखि मध्यान्ह १२ बजेसम्म बजार, पशल, बैंक तथा वित्तिय संस्थाहरु खोल्न दिने निर्णय गरेको रंगेली नगरपालिकाका नगरप्रमुख बगडियाले बताए ।

उनले आ–आफ्नो पालिकामा विकास निर्माणका अघि बढाउन स्थानीय मजदुर तथा श्रमिकलाई मात्र काममा लगाउने, नेपाल–भारत आवत जावत र एक पालिकाबाट अर्को पालिकामा हिड्डुलमा कडाइ गरि बन्दाबन्दीमा सवै पालिकामा एकरुपता कायम गर्ने निर्णयसमेत भएको बताए ।

ती स्थानीय तहमा कोरोना पुष्टि हुने लक्षणसहितका र लक्षण नभएका संक्रमितको उचित व्यवस्थापनका लागि प्रदेश सरकारलाई आग्रहसमेत गर्ने निर्णय गरेको रतुवामाई नगरपालिकाका नगरप्रमुख रविन राईले जानकारी दिए ।