काठमाडौं, ५ असार-सत्तारुढ नेपाल कम्युनिस्ट पार्टी (नेकपा) ले नेपाल कुनै पनि सैन्य गठबन्धनमा सामेल नहुने स्पष्ट पारेको छ । चिनियाँ कम्युनिस्ट पार्टी (सीपीसी) स्थापनाको ९९ वर्ष पुगेको र नेपाल–चीन दौत्य सम्बन्ध स्थापनाको ६५ वर्ष पूरा भएको अवसरमा नेकपाका र सीपीसीका नेताहरुबीच भएको भिडियो कन्फ्रेन्समा अध्यक्ष पुष्पकमल दाहाल प्रचण्डले नेपाल कुनै सैन्य गठबन्धनमा सामेल नहुने स्पष्ट पारेका हुन् ।

प्रचण्डले भिडियो कन्फ्रेन्समा नेपाल–चीन सम्बन्ध पहिले देखि नै राम्रो रहेको स्मरण गर्दै आगामी दिनमा पनि दुई देशबीच थप राम्रो सम्बन्ध रहने विश्वास व्यक्त गरे ।

प्रचण्डको भनाई उदृत गर्दै स्कुल विभाग उपप्रमुख वेदुराम भुसालले भने, ‘अध्यक्ष प्रचण्डले नेपाल सधै असंलग्न परराष्ट्र नीतिमा दृढ रहेको, सधै आफूहरु एक चीन नीतिमा अडिग रहेको र नेपाललाई चीन विरोधी गतिविधिमा प्रयोग हुन नदिने धारणा राख्नुभयो ।’

प्रचण्डले भौगोलिक रुपमा, जनसंख्या र विकासमा एकरुपता नभएपनि नेपाल चीनबीच सम्बन्धमा कुनै समस्या नरहेको बताए । उनले भने, ‘हाम्रो सम्बन्ध धेरै राम्रो छ । नेपाल सधै तिब्बत, हङकङ र सिन्जियाङको विषयमा चीनको समर्थन गर्छ ।’

प्रचण्डले बीआरआई नेपाल जस्ता विकासशील देशहरको विकासका लागि अवसर भएको बताए । भूकम्प र कोराना भाइरस (कोभिड–१९) को महामारीमा चीनले नेपाललाई गरेको सहयोगको प्रसंशा गर्दै उनले भने, ‘सहज अवस्थामा र असहज अवस्थामा चीनको सहयोग नेपालका लागि धेरै महत्वपूर्ण छ । नेपाल चीन दुःख सुखका मित्र हौं ।’

नेकपा चीन सरकार र चिनियाँ कम्युनिस्ट पार्टीसँग विकास, समृद्धि र शान्तिका लागि सधै सहकार्य गरेर जान इच्छुक रहेको प्रचण्डको भनाई थियो ।

कन्फ्रेन्समा नेकपाका स्कुल विभाग प्रमुख एवं उपप्रधान तथा रक्षमन्त्री ईश्वर पोखरेलले भूकम्प र कोरोना भाइरस (कोभिड–१९) को महामारीमा नेपाललाई चीन सरकारले गरेको सहयोग प्रति आभार व्यक्त गरे ।

उनले नेकपा र सीपीसीबीचको सम्बन्ध अझ सुदृढ हुने विश्वास पनि व्यक्त गरे । विदेश विभागका उपप्रमुख भुसालले चिनियाँ कम्युनिस्ट पार्टी (सीपीसी) स्थापनाको ९९ वर्ष पुगेको र नेपाल चीन दौत्य सम्बन्ध भएको ६५ वर्ष पूरा भएको अवसरमा शुभकामना व्यक्त गरेका थिए ।