जनकपुर, ४ वैशाख-लकडाउनको मौका छोपी जंगलबाट चोरीतस्करी गर्नेविरुद्ध प्रदेश–२ मा वन कार्यालयले विशेष अभियान चलाएका छन् । यही अभियान अन्तर्गत बाराको चैतापुर वनबाट गएराती ८ जनालाई पक्राउ गरिएको छ ।

पक्राउ पर्नेमा २३ वर्षीय शिवनारायण माझी, २५ वर्षका रमेश माझी, ३० वर्षीय भजेन्द्र साह, ३२ वर्षीय यादव घिमिरे, २२ वर्षीय दीपक भण्डारी, ३२ वर्षीय परमेश माझी, २९ वर्षका बमभोली सहनी, ३८ वर्षीय नारायण चौधरी रहेका छन् ।

पक्राउ परेका सबै बाराको जितपुर सिमरा–१७ का रहेका जिल्ला वन कार्यालय बाराका अधिकृत मनजुर अहमदले वताए । उनीहरुको साथबाट भाला, बन्चरो, टर्च, जाल बरामद गरिएको वन अधिकृत अहमदले बताए ।

गस्ती टोली आएको थाहा पाएछि १ जना भने भाग्न सफल भएका र उनको खोजी भइरहेको बताइएको छ । प्रदेश–२ का उद्योग, वन, पर्यटन महानिर्देशनालयका अधिकृत सुरेश शर्माले प्रत्येक जिल्लामा वन तस्करविरुद्ध विशेष अभियान चलाइएको वताए ।

यो प्रदेशमा जम्मा ३.९९ प्रतिशत मात्रै वन क्षेत्र छ । जबकी एफआरएको तथ्यांक अनुसार प्रदेश १, ३, ४, ५, ६ र ७ मा क्रमशः १७.१६, १६.५, १२.३६, १४.७४, १७.९० र १७.३४ प्रतिशत वन क्षेत्र रहेको छ ।