विराटनगर । सुनसरीको गढी गाउँपालिका – ६ घर भएका ४७ वर्षीय रिङ व्यवसायी ज्ञानचन्द ऋषिदेवको फरुवा प्रयोग गरेर हत्या भएको खुलेको छ ।
ऋषिदेवको सोमबार बिहान टाउको छुटिएको अवस्थामा शव गढी गाउँपालिका २ थलाहामा भेटिएको थियो । हत्यामा प्रयोग भएको फरुवा पनि प्रहरीले बरामद गरेको छ ।
थलाहामा टाउकोदेखि मुनिको भाग भेटिएको थियो । जिउ भेटिएको स्थानदेखि करिब ५० मिटर उत्तर पश्चिममा गढी २ गुजाइटोकीमा टाउँको भेटिएको सुनसरी प्रहरीका प्रवक्ता डिएसपी नविनकृष्ण भण्डारीले जानकारी दिए । शव भेटिएको स्थान ऋषिदेवले बालुवा र सिमेन्ट प्रयोग गरि रिङ बनाउने उद्योग रहेको छ । हत्याको कारण खुलि नसकेको प्रहरीले जनाएको छ । यस विषयमा अनुसन्धान भइरहेको डिएसपी भण्डारीले बताए ।
प्रहरीले यस घटनामा शंकास्पद तीन जनालाई नियन्त्रणमा लिएर अनुसन्धान सुरू गरेको डिएसपी भण्डारीले जानकारी दिए । प्रहरीले नियन्त्रणमा लिएर अनुसन्धान गरिएको ऋषिदेव थरकै व्यक्तिहरु रहेका छन् । उनको रिङ बनाउने ठाउँमा नियमित आउनेलाई प्रहरीले नियन्त्रणमा लिएर अनुसन्धान सुरु गरेका छ । ‘नियन्त्रणमा लिएको व्यक्तिले लगाएको कपडामा रगत लतपतिएको छ । हामी घटनाको नजिक पुग्न लागेका छौं । एक जनाको मात्रै संलग्न छ कि अरुको पनि छ । त्यस विषयतर्फ पनि अनुसन्धानको दायरालाई फराकिलो बनाएका छौं,’ घटनाको अनुसन्धान गर्दै आएका एक प्रहरी अधिकृतले भने ।