विराटनगर, ६ भदौ–मोरङको बुढीगंगा गाउँपालिका–१ स्थित आरती स्ट्रिप्स शनिबारदेखि पुनः सञ्चालनमा आएको छ । भारतीय मजदुरका कारण कोरोना संक्रमण फैलिएपछि बन्द भएको सो उद्योग शनिबारबाट पुनः सञ्चालनमा आएको हो ।

उद्योगमा कार्यरत ६०० बढि मजदुर र कर्मचारीको पिसिआर परीक्षण गरेपछि उद्योगलाई सेनिटाइज गरेर सञ्चालनमा ल्याएको उद्योगका प्रमुख सञ्जीव शर्माले जानकारी दिए ।

उद्योगमा कार्यरत सबैको पिसिआर परीक्षण गर्दा ६२ जनामा कोरोना संक्रमण देखिएको छ । संक्रमितहरुलाई उद्योगले आफ्नै कम्पाउण्डमा आइसोलेसन बनाएर राखेको छ ।

लुकिछिपी आएका भारतीय कामदारका कारण उद्योगका २ मजदुरमा सुरुमा कोरोना देखिएको थियो । त्यसपछि उद्योग बन्द गरी मजदुरहरुलाई क्वारेन्टाइनमा राख्नुपर्नेमा उद्योग सञ्चालन गर्दा अन्य मजदुरमा पनि कोरोना देखिएको थियो ।

मजदुरलाई कोरोना देखिएपछि उद्योगले आफ्नै खर्चमा सबै मजदुरको पिसिआर परीक्षण गराएको उद्योगका जनरल मेनेजर जीवन तिम्सिनाले जानकारी दिए । कोरोना परीक्षणपछि संक्रमितलाई आइसोलेशनमा राखेर अन्य मजदुरबाट आंशिक रुपमा उद्योग सञ्चालनमा आएको हो । उद्योगमा ७० प्रतिशत भारतीय मजदुरले काम गर्दै आएका छन् ।