विराटनगर । सप्तकोसी नदीको पुलमा कार छोडेर बेपत्ता भएका डाक्टरको शव फेला परेको छ। दमक – १ घर भई मदन भण्डारी ट्रमा सेन्टर उर्लाबारीमा कार्यरत् रहेका ३२ वर्षीय सर्जन डा। प्रज्जवल कोइरालाको शव मंगलबार अपराह्न फेला परेको हो।

उनको शव बराहक्षेत्र नगरपालिका २ स्थित कोसीको भंगालोमा शव फेला परेको जिल्ला प्रहरी कार्यालय उदयपुरका प्रमुख प्रहरी उपरीक्षक ज्ञानेन्द्र फुयाँलले बताए ।

‘शव सडेगलेको अवस्थामा फेला परेको छ, आफन्तले शव पहिचान गर्नुभएको छ,’ फुयाँलले भने।

कोसीमा माछा मार्नेहरूले शव तैरिरहेको देखेपछि प्रहरीलाई खबर गरेका थिए । आफन्तले शवको पहिचान गरेपछि पोस्टमार्टमका लागि बिपी कोइराला स्वास्थ्य विज्ञान प्रतिष्ठान लगिएको छ।

उनी भदौ १० गते राति सप्तकोसी नदीको छेउमा कार छोडेर डाक्टर बेपत्ता भएका थिए।

बेलका नगरपालिका(८ मा कार पार्किङ गरेर कोइराला बेपत्ता भएका थिए। सप्तकोसी नदीको पुलको बीच भागमा जुत्ता, मोजा र मोबाइल भेटिएको थियो।

कोइराला ट्रमा सेन्टरमा सेवा गर्नुअघि उर्लाबारीको अरनिको अस्पताल र दमकको लाइफलाइन अस्पतालमा काम गर्थे। उनले आत्महत्याको बाटो रोज्नुको कारणबारे अनुसन्धान भइरहेको प्रहरीले जनाएको छ।