विराटनगर, २० मंसिर । विभिन्न सामाजिक कार्यहरु निरन्तर गरिरहेको रोटरी क्लब अफ विराटनगर डाउनटाउनले निशुल्क दन्त शिविर र जनचेतना मुलक कार्यक्रम आयोजना गरेको छ ।

वरिष्ठ दन्त चिकित्सक डा. अभिषेक कुमार र उनको टोलीसँगको सहकार्यमा विराटनगरस्थित महेन्द्र रात्रि माध्यामिक विद्यालयमा दन्त शिविर र जनचेतना मुलक कार्यक्रम गर्दै दन्त किटसमेत वितरण गरेको हो ।

कार्यक्रमबाट सो विद्यालयमा अध्ययनरत विद्यार्थी, विद्यालयका कर्मचारी र शिक्षक÷शिक्षिकाहरु लाभान्वीत भएका छन् । सो अवसरमा निःशुल्क दन्त परिक्षणका साथै बालबालिकालाई टूथब्रस र टूथपेस्ट सहितको डेन्टल किट समेत वितरण गरिएको थियो ।

शिविरमा परिक्षण गरिएका बालबालिकाहरूलाई सहुलियत दरमा आवश्यक उपचार समेत गरिने रोटरी क्लब अफ विराटनगर डाउन टाउनकी अध्यक्ष संचिता जैनले जानकारी दिइन् ।

उनले बालबालिकाको प्रारम्भिक जाँचपछि उपलब्ध गराइएको पुर्जी देखाएर सहुलियत उपचार सेवा पाउने बताइन् । शिविरमा ५० जना लभान्वित भएका छन् ।
कार्यक्रममा क्लबकी अध्यक्ष जैनले शिविरमा बालबालिका, शिक्षक र कर्मचारीहरूलाई दाँतको परिक्षणमा सहयोग गरेकोमा डा. अभिषेक कुमार र उनको टोलीलाई आभार प्रकट गरिन् ।

सो अबसरमा रोटरी क्लब अफ विराटनगर डाउनटाउनकी चार्टर प्रेसिडेन्ट डा. ममता वर्माले पनि दन्त स्वास्थ्य कसरी कायम राख्ने भन्ने बारे सचेतना जगाउन बालबालिकासँग अन्तरक्रिया गरिन् ।

सो अबसरमा क्लबकी अध्यक्ष जैन, सचिव अनिता सारडा, जनसम्पर्क अधिकारी मञ्जु अग्रवाल, कुसुम अग्रवाललगायत क्लबका पदाधिकारी र सदस्यहरुको उपस्थिती रहेको थियो।