विराटनगर, १७ कात्तिक । डिल्लीबजार कारागारबाट मोरङ सरुवा गरि विराटनगर ल्याइएका गुण्डा नाइके अभिषेक गिरीलाई आन्दोलन गरेर अन्य कैदीबन्दीले छिर्न नदिएपछि सप्तरी लगिएको छ ।

मंगलबार बिहान विराटनगरस्थित मोरङ कारागारमा गुण्डा नाइके गिरीलाई ल्याइएपनि अन्य कैदीबन्दीले आन्दोलन गरेपछि उनलाई मंगलबारनै सप्तरी कारागार पठाइएको हो । कारागारभित्र कैदीबन्दीलाई यातना र असुली धन्दा चलाउने गिरीलाई ल्याउन पाइँदैन भन्दै कैदीबन्दीहरूले निरन्तर आन्दोलन गरेपछि उनलाई सप्तरी पठाइएको हो ।

कैदीबन्दी आन्दोलनमा उत्रिएपछि कारागार बाहिर र भित्र ठूलो संख्यामा सुरक्षाकर्मी परिचालन गरिएको थियो । ठूलो संख्यामा कैदीबन्दीहरूले मंगलबार विहानैदेखि आन्दोलन गरेर गिरीलाई जेलभित्र पस्नै नदिएपछि सप्तरी कारागार पठाएइको मोरङ कारागारका निमित्त जेलर रामप्रसाद पोखरेलले जानकारी दिए । ‘जेलभित्र छिराउन सक्ने अवस्थानै नभएपछि गिरीलाई सप्तरी कारागार पठाइएको छ ।’ भने,‘कैदीहरूले उनलाई इन्ट्री नदिइयोस् भनेर निरन्तर आन्दोलन गरेपछि उता पठाइएको होे ।’

कारागार व्यवस्थापन विभागले गिरीलाई गते डिल्लिबजार कारागारबाट भदौ १७ गते नै सरूवा गरेको थियो । सरूवालगत्तै विरोध सुरू भएपछि विभागले उक्त निर्णय कार्यान्वयन गरेको थिएन ।

मोरङ कारागारमा रहँदा गिरीले जेलभित्रैबाट असुली र फिरौती धन्दा चलाएको आरोप लागेपछि २०७४ चैत २३ गते डिल्लीबजार कारागार सारिएको थियो ।सरकारी कर्मचारीलाई बन्धक बनाएर फिरौती मागेको आरोपमा गिरीलाई प्रहरीले २०७० सालमा पक्राउ गरेको थियो । सोहि मुद्धामा गिरी जेलमा छन् । गैरकानुनी रूपमा सम्पत्ति आर्जन गरेको अभियोगमा सम्पत्ति शुद्धीकरण अनुसन्धान विभागले समेत गिरीमाथि विशेष अदालतमा मुद्दा चलाएको छ ।