विराटनगर, माघ १३–सडक सञ्जालको पहुँच पुगेसँगै भोजपुरमा उत्पादन भएका सुन्तलाले राम्रो बजार पाउन थालेका छन् । सडक बनेपछि सुन्तला जिल्लाभित्र मात्र होइन तराईका विभिन्न जिल्लाहरूमा पनि बिक्रीका लागि जाने गरेको छ । भोजपुरका सुन्तला धनकुटा, हिले, धरानलगायत पूर्वी क्षेत्रका बजारमा बिक्री हुने गरेको छ । खान तथा कोसेलीका रूपमा बिक्रि हुने सुन्तलाको बजार बढेसँगै किसानहरूको आम्दानीमा पनि मनग्य वृद्धि आएको छ ।
भोजपुर जिल्ला तराईसँग सडक सञ्जालमा जोडिएपछि त्यहाँ उत्पादित सुन्तलाको मूल्यसमेत वृद्धि भएको छ । जिल्लामा उत्पादन भएका सुन्तलाको मूल्य केही समयमा अझै बढ्ने व्यावसायीहरू बताउँछन् । भोजपुरमा शनिबार र बुधबार लाग्ने हटियाका साथै सदरमुकामका चोकहरूमा समेत सुन्तला बिक्रीका लागि ल्याउने गरिएको छ ।
जिल्लाको अरूण गाउँपालिकाको याङपाङ, षडानन्द नगरपालिकाको कुदाकाउले, साङपाङ, देउराली, भोजपुर नगरपालिकाका दावाँ, टेम्के, मयुम गाउँपालिकाको छिनामखु, अन्नपूर्ण, कोट, गोगनेलाई सुन्तला उत्पादनको पकेट क्षेत्र घोषणा गरिएको भोजपुरका सुन्तला व्यवसायी ज्ञान कार्कीले बताए । सुन्तला खेतीबाट राम्रो आम्दानी हुने भएपछि किसानहरू थप बिरुवा लगाएर व्यावसायिक बन्न थालेका छन । नगदेबालीको रूपमा परिचित सुन्तलाको उत्पादन राम्रो हुँदा किसानहरूले वर्षे्नि ८० हजारदेखि १ लाखभन्दा बढीसम्म आम्दानी गर्ने गरेका छन् ।
भोजपुरका गाउँ नै सडक सञ्जालमा जोडिएपछि बोटमै भाउ गरेर तराईका जिल्लाहरूमा निकासी गर्ने गरिएको छ । सुन्तला टिप्ने सिजनमा सुन्तला टिप्न, बोक्नका साथै ढुवानी गर्ने ठाउँसम्म पुर्याउनका लागि गाउँलेले रोजगारी पनि पाएका छन् । भोजपुरमा सुन्तला उत्पादन तथा व्यावसाय राम्रो भएकाले यसलाई विस्तार गर्दै कृषकहरूलाई अझ व्यावसायिक बनाउन सरकारी निकाय र भोजपुरका नौवटै स्थानीय तहले प्रभावकारी योजना बनाउनुपर्ने सरकोवारवालाहरू बताउँछन् ।
