विराटनगर, २९ कात्तिक–मोरङको रतुवामाई नगरपालिका–१ स्थित सशस्त्र प्रहरी बल नेपाल बोर्डर आउट पोष्ट (बिओपी) बरडंगा चुनीमारीले भारतबाट अवैध रुपमा भित्र्याइएका पटाकाजन्य पदार्थ नष्ट गरेको छ । विभिन्न मिति र स्थानबाट बिओपी चुनीमारीबाट खटिएको शसस्त्र प्रहरीको टोलीले बरामद गरेको ठुलो परिमाणको पटाका नष्ट गरेको हो ।

दीपावली एवम् छठ पर्वको अवसरमा भारतबाट अवैध रुपमा भित्र्याइएका ५८ हजार ८ सय थान पटाका (खुर्सानी बम) शुक्रबार बेलुका स्थानीय जनप्रतिनिधि, सञ्चारकर्मी, बुद्धिजिवी तथा सामाजिक अगुवाहरुको राहोवरमा बिओपी परिसरभित्रै नष्ट गरेको हो ।

सशस्त्र प्रहरी बल नेपाल बोर्डर आउट पोष्ट (बिओपी) बरडंगा चुनीमारीका इन्चार्ज सुकबहादुर तामाङले बिओपीको कार्यक्षेत्र अन्तर्गत विभिन्न मिति र स्थानबाट बरामद गरिएको पटाका नष्ट गरिएको बताए । उनका अनुसार एक साता अघि पनि २८ हजार पाँच सय ६० थान पाटाका र पटाकाजन्य वस्तु नष्ट गरिएको थियो ।