डडेल्धुरा, ५ असार-भारतको बैङ्लोरबाट घर फर्किएका दार्चुलाको मार्मा गाउँपालिका-३ का एक युवकको मृत्यु भएको छ । कैलालीसँग जोडिएको गौरीफण्टा नाका भएर २९ जेठमा मार्माको लटिनाथ पुगेका २१ वर्षीय युवकको बिहीबार बेलुकी मृत्यु भएको मार्मा गाउँपालिकाका स्वास्थ्य संयोजक चक्रसिह धामीले जानकारी दिए ।

मानसिकरूपमा अस्वस्थ रहेका युवकलाई एक दिन मात्रै लटिनाथ मावि रस्कोटको क्वारेन्टाइनमा राखिएको थियो । धनगढी र लटिनाथमा गरिएको आरडीटीमा उनको नतिजा रिपोर्ट नेगेटिभ आएको थियो । परिवारले उपचार गरिदिने भन्दै घर लगेका युवकमा ज्वरो बढ्दै गएको थियो ।

मृतक युवकमा कोरोना संक्रमणको आशंका गरिएको छ भने उनको स्वाब संकलन गरी पीसीआर परीक्षणका लागि धनगढी प्रयोगशाला पठाइएको स्वास्थ्य संयोजक धामीले बताए ।