काठमाडौं,  २६ जेठ-नेपाल यातायात व्यवसायी राष्ट्रिय महासंघका महासचिव सरोज सिटौलाले यात्रुसँग चर्को भाडा नलिएको स्पष्ट पारेका छन् ।महासंघ र उनको नाम जोडेर यात्रुसँग चर्को भाडा असुलेको समाचार बाहिर आएपछि महासचिव सिटौलाले स्पष्ट पारेका हुन् ।

‘महासंघ र मेरो नाम जोडेर समाचार आएको रहेछ,’ सिटौलाले भने, ‘रातभर म गाडी रोक्नमा खटिएको छु । ट्राफिक प्रहरीलाईसमेत जानकारी गराएको छु । कहाँबाट चर्को भाडा लिनु ?’ अहिलेको विषम परिस्थितीमा अहोरात्र खटेर यात्रुको सेवामा  खटिएको उनले बताए ।

‘कोरोना महामारीमा यात्रुको सेवामा खटिएको छु,’ उनले भने, ‘यस्तो समयमा विचल्लीमा परेका नागरिकलाई गन्तव्यस्थलसम्म पुग्नका लागि सरकारी निकाय तथा महानगरीय ट्राफिक प्रहरी महाशाखाको समन्वयमा सहजीकरण गर्दै आएको छु ।’