विराटनगर, २२ जेठ-प्रदेश १ मा पहिलो पटक उदयपुरको भुल्केमा देखिएको कोरोना संक्रमणको अन्त्य भएको छ ।  गत वैशाख ५ गते उदयपुरको भुल्केमा संक्रमण देखिएको थियो । उदयपुरमा संक्रमण देखिएका ३३ जना नै डिस्चार्ज भएसँगै भुल्के संक्रमणको अन्त्य भएको सामाजिक विकास मन्त्री जीवन घिमिरेले बताए ।

कोसी अस्पताल कोभिड १९ उपचार केन्द्रमा उपचाररत २७ जनालाई डिस्चार्ज गर्दै मन्त्री घिमिरेले सो कुरा बताएका हुन् । उनले जिल्ला अस्पताल धनकुटामा देखिएको संक्रमणको पनि अन्त्य भएको बताए । अस्पतालका ४ जना बिहीबार डिस्चार्ज भएसँगै अस्पतालभित्रको संक्रमण पनि अन्त्य भएको मन्त्री घिमिरेले बताए ।

धनकुटा जिल्ला अस्पताल भित्रको संक्रमणको अध्ययन भइरहेको उनले बताए । ‘अस्पतालभित्र कसरी संक्रमण भयो भनेर अध्ययन भइरहेको छ’ मन्त्री घिमिरेले भने । उनले उदयपुर र धनकुटाबाहेकका ट्राभल हिस्ट्री विदेशबाट भएको मन्त्री घिमिरेको भनाइ छ ।

गोठगाउँमा कोरोना अस्पताल सुरु

मोरङको सुन्दरहरैचा नगरपालिकास्थित गोठगाउँमा रहेको पूर्वाञ्चल विश्वविद्यालयको मेडिकल कलेजमा बिहीबारदेखि कोरोना विशेष अस्पताल सञ्चालनमा ल्याइएको छ ।

सामाजिक विकास मन्त्री जीवन घिमिरेले आजदेखि २ सय वेडको कोरोना अस्पताल सञ्चालनमा ल्याईएको जानकारी दिए । आजदेखि संक्रमण देखिएकाहरूलाई गोठगाउँमा उपचार गर्नेगरी अस्पताल सुरु गरिएको मन्त्री घिमिरेले बताए ।

गोठगाउँपछि मेची अस्पतालमा कोरोना उपचार केन्द्र सञ्चालनको तयारी भइरहेको उनले बताए । मन्त्री घिमिरेले प्रदेश १ मा संक्रमितका लागि अस्पतालमै राखेर उपचार गर्नेगरि तयारी भइरहेको बताए । कोरोनाको प्रकोप अझै बढ्ने देखिएसँगै विभिन्न स्थानमा उपचार  केन्द्र निर्माणको काम भइरहेको मन्त्री घिमिरेले जानकारी दिए ।