विराटनगर, जेठ ५–विराटनगर महानगरपालिकाका मेयर भीम पराजुलीले वडा नं. ११ को नव निर्मित कार्यालय भवनको सोमबार उद्घाटन गरेका छन् । मेयर पराजुलीले पिछरामा एक कठ्ठा नौ धुर जग्गामा ८५ लाख रुपैयाँको लागतमा निर्माण भएको वडा कार्यालय भवनको उद्घाटन गरेका हुन् । उक्त एक तल्ले भवनमा पाँच बटा कोठा निर्माण गरिएको छ ।

भवनको शिलन्यास २०७६ कात्तिक १ गते भएको थियो । भवन निर्माणका लागि तोकिएको समय भन्दा एक महिना अगाडि सम्पन्न भएको हो । उक्त भवनमा केही दिन भित्र माथिल्लो तल्लामा सभा हल लगायतका थप कोठा निर्माण गरिने वडा अध्यक्ष तीर्थेन्द्र न्यौपानेले जानकारी दिए।

वडा कार्यालय भवन उद्घाटन गर्दै मेयर पराजुलीले कोभिड–१९ को सङ्क्रमण फैलिन नदिन नगरले काम गरिरहेको जानकारी दिदै बन्दाबन्दीको पालना सहित सामाजिक दुरी कायम गर्न नगरबासीहरुसँग आग्रह गरे ।

वडाको सम्पूर्ण सेवाहरु सोमबारदेखी नयाँ भवनमा सञ्चालन हुने वडा सदस्य विमल पोखरेलले जानकारी दिए । यस अघि वडा कार्यालय रहेको भवन सानो भएकाले सेवाग्राहीको कार्य सञ्चालन गर्न समस्या उत्पन्न भएकाले वडाकै जग्गामा अर्को भवन निर्माण गरिएको हो ।