काठमाडौं, जेठ ४-यूएईको एमपी स्टार होटलमा कार्यरत नेपाली कामदारहरू आन्दाेलित भएका छन् । उनीहरू कम्पनीले विगत २ महिनादेखि तलब नदिएपछि आन्दोलनमा उत्रिएका हुन् ।

उनीहरूका अनुसार होटलले विगत २ महिनादेखि तलब दिएको छैन । साे होटलमा करिब ३ सय नेपाली कार्यरत छन् । उक्त होटलमा काम गर्दै राजाराम पौडेलका अनुसार होटलले एउटा कोठामा ७ जनासम्म कोचेर राखेको छ ।

कम्पनीले २ महिनादेखि तबल नदिएपछि बाध्य भएर आन्दोलनमा उत्रिएको पाैडेलले जानकारी दिए । काम र तलब कम्पनीले नदिने भएपछि आफूहरू साह्रै अप्ठ्याराेमा परेकाे र अब सरकारले नै स्वदेश फर्काउने वातवरण मिलाइदिनुपर्ने मागसमेत उनीहरूले गरेका छन् ।

उनीहरू नेपालबाट गल्फ भन्ने म्यानपावरबाट गएका हुन् । यूएईबाट  करिब १५ हजार नेपाली घर फर्किन चाहेको त्यहाँको दूतावासले जनाएको छ । यूएईमा लकडाउन भएदेखि नै त्यहाँ विदेशी कामदारको जनजीवन अस्तव्यस्त हुन थालेको छ ।