सप्तरी, ३१ वैशाख-सप्तरीको डाक्नेश्वरी नगरपालिका-३ हटैलका १ युवकमा कोरोना संक्रमणको पुष्टि भएपछि सिल गरिएको सुनिए पनि बस्तीमा हालसम्म सेनिटाइजसम्म नगरिएको स्थानीयहरूले गुनासो गरेका छन् ।

बस्तीमा संक्रमित भेटिएसँगै आफूहरू त्रसित भएको अवस्थामा हालसम्म जनप्रतिनिधीले कुनै चासो नदेखाएको भन्दै स्थानीयले गुनासो गरेका हुन् । कोरोना संक्रमित युवा बस्तीमा घुमफिर गर्नुका साथै विभिन्न व्यक्तिहरूसँग उठबस गरेको पाइए पनि स्थानीय प्रशासन तथा जनप्रतिनिधीले वास्ता नगरेको चन्द्रशेखर साहले गुनासो गरे ।

‘विभिन्न सञ्चारमाध्यमहरूमा हाम्रो हटेल गाउँलाई सिल गरिएको समाचारमा आएको छ, तर हामीले बस्तीमा कुनै त्यस्तो अनुभूति गरेका छैनौं’ उनले भने, ‘जसलाई जहाँ घुम्न मल लागेको छ घुमेकै छ । एक पटक मात्र प्रहरीको खाली गाडी गाउँमा आएको हो । सुरक्षाकर्मी पनि कतै छैन।’

संक्रमित व्यक्तिको घर, उठबस गरेको ठाउँसहित टोलमा सेनिटाइज गर्नुपर्नेमा हालसम्म केही नभएको उनले गुनासो गरे । भारतीय सिमावर्ती क्षेत्र तथा अति विकट ठाउँ रहेकोले वास्तविकता बुझ्न बाहिरबाट समेत कोही नआएको गुनासो गर्दै उनले आफूहरूको समस्याप्रति गम्भीर बन्न आग्रह गरेका छन् ।