विराटनगर, फागुन १८–कानुन न्याय तथा संसदीय मामिला मन्त्री शिवमाया तुम्बाहाम्फेले कानुन निर्माण गरेर तीन तहका सरकारवीच रहेका अन्तरर्विरोध अन्त्य गर्न लागिएको बताएकी छन् । आइतबारदेखि विराटनगरमा सुरू भएको प्रदेश १ का स्थानीय तहका उपप्रमुखहरूको प्रशिक्षण कार्यक्रमको उद्घाटनका क्रममा तुम्बाहाम्फेले तीन तहका सरकारवीचको अन्तर्विरोध अन्त्य गर्न कानुनमै व्यवस्था गर्न लागिएको बताइन् ।

तुम्बाहाम्फेले राम्रो काम गरेर देखाउन स्थानीय तहका उपप्रमुखहरूलाई आग्रह पनि गरिन् । अधिकांश महिलाहरू उपप्रमुख भएका कारण राम्रो काम गरेर इतिहासमा स्थापित हुन तुम्बाहाम्फेको आग्रह छ । कार्यक्रममा जिल्ला समन्वय समिति मोरङका संयोजक नरेश पोखरेलले बजेट विनियोजन गरेर योजना तर्जुमा गर्ने परिपाटीको अन्त्य गर्नुपर्ने बताए ।

पोखरेलले निर्वाचन क्षेत्र विकास कार्यक्रमका नाममा संसदहरूले आफू खुसी गोजीका योजनाहरू बांड्ने काम राम्रो नभएको धारणा राखे । कार्यक्रममा प्रदेश १ का १ सय ३७ वटै स्थानिय तहका उपप्रमुखहरूको सहभागिता छ । स्थानीय विकास प्रशिक्षण प्रतिष्ठानको आयोजनामा सुदुर पश्चिम प्रदेशबाट सुरू गरिएको प्रशिक्षण कार्यक्रम ६ वटा प्रदेशमा सम्पन्न भइसकेको छ । प्रशिक्षणमा योजना तर्र्जुमा, राजस्व अनुगमन र न्याय सम्पादनका विभिन्न पाटोका विषयमा प्रशिक्षकहरूले प्रशिक्षण दिने जनाइएको छ ।