विराटनगर, चैत १६–पूर्वमन्त्री तथा प्रतिनिधिसभा सदस्य शिवकुमार मण्डलले नेपाल सरकारले जारी गरेको लक डाउनका कारण दैनिक ज्यालादारी काम गरेर जिवनयापन गर्ने विपन्न सुकुम्बासी परिवारलाई तीनै तहका सरकारबीचको समन्वयमा खाद्यान्न उपलब्ध गराउनुपर्ने बताएका छन् ।

सञ्चारकर्मीहरुसँगको कुराकानीमा नेता मण्डलले दैनिक मजदुरी गरेर रोजिरोटी चलाउने परिवारलाई लकडाउनका कारण हातमुख जोर्न समस्या पर्दै गएकाले तीनै तहका सरकारबीचको समन्वयमा उनीहरुलाई तत्काल राहतको व्यवस्था गर्नुपर्ने बताएका हुन् ।

‘दिनभरी काम गरेर बेलुका परिवारको पेट पाल्ने जनता यतिबेला भोकभोकै बस्नुपर्ने अवस्था सृजना भएको छ । रोग संक्रमण फैलन नदिन लक डाउन एउटा मात्र उत्तम विकल्प हो । तर, मजदुरी गरेर परिवार चलाउने जनताले सवैतिर बन्द भएपछी के गरेर खाने ?’ उनले भने,‘त्यसैले उनिहरुलाई तत्काल खाद्यान्नको व्यवस्था गरिनुपर्छ । नत्र भने जनता बाल बच्चाकै पेट पाल्नका लागि पनि घर बाहिर निस्कन बाध्य हुन्छन, लक डाउन उल्लंघन हुन्छ र संक्रमण फैलने जोखिम हुन्छ । त्यसर्थ त्यस्ता परिवारका लागि सरकारले राहतको प्याकेज तत्काल ल्याउन जरुरी छ ।’

नेकपा केन्द्रीय सदस्य समेत रहेका सांसद मण्डलले लघुवित्त वित्तिय संस्था मार्फत लिइएको ऋण र व्याज समेत लक डाउन अवधिभर छुट गर्नुपर्ने बताएका छन् । उनले लघुवित्त मार्फत अधिकांश किसान र मजदुर बर्गले ऋण लिएको बताउँदै लक डाउनका कारण आर्थिकोपार्जनमा समस्या भएकाले सो समय अवधिभर लिने किस्ता र व्याज छुट गर्न लघुवित्त वित्तिय संस्थाहरुलाई आग्रह गरे ।

‘यतिबेला हुने खोनेकै पनि अवश्था नाजुक बन्दै गएको छ । अझ दैनिक मजदुरी गर्ने र खेती किसानी गर्ने परिवार एकदमै समस्यामा छन् । उनीहरुलाई परिवार चलाउनै समस्या छ ।’ उनले भने,‘यो अवस्थामा माइक्रोफमइनान्सको किस्ता तिर्न जनता असमर्थ छन् । त्यसैले यो अवधिभर ऋण र व्याज जसरी पनि छुट गरिनुपर्छ । जनताको पिडा बुझिदिनुपर्छ ।’