विराटनगर । जिल्ला ट्राफिक प्रहरी कार्यालय मोरङले शनिबार विराटनगर महानगरपालिकामा सार्वजनिक यातायात साधनहरूले लिइरहेको भाडादरको अनुगमन गरेको छ। लोकसेवा आयोगको परीक्षामा सहभागी हुन आउने विद्यार्थीहरूबाट सिटी सफारी लगायतका सार्वजनिक सवारी साधनहरूले मनपरी भाडा लिइरहेको गुनासो बढेपछि यो अनुगमन अभियान थालिएको हो।
मोरङ ट्राफिक प्रहरी प्रमुख प्रहरी निरीक्षक राजन लम्साल आफैं सडकमा उत्रिएर अनुगमन गरेका छन्। लम्सालको नेतृत्वमा खटिएको ट्राफिक प्रहरी टोलीले विराटनगर महानगरपालिकाका विभिन्न स्थानमा बस, विंगर, माइक्रो, म्याजिक, ई रिक्सा र टेम्पु जस्ता यात्रुवाहक सवारी साधनहरूले लिइरहेको भाडादरको निरीक्षण गरेको हो।

‘परीक्षार्थीहरू लगायत आम यात्रुहरूलाई मनपरी भाडा लिएर ठगी भइरहेको गुनासो आएपछि हामीले यो अनुगमन अभियान चलाएका हौं,’ प्रहरी निरीक्षक लम्सालले भने। उनका अनुसार अनुगमनका क्रममा केही सवारी साधनहरूले निर्धारित भाडादर भन्दा बढी रकम असुलेको पाइएको छ। यसरी बढी भाडा लिनेलाई फिर्ता गराउन लगाएको र फेरी लिएको पाइए कारवाहीको दायारमा ल्याउने उनले बताए ।

अनुगमनका क्रममा प्रहरीले सवारी चालकहरूलाई निर्धारित भाडादर लागू गर्न निर्देशन दिएको छ। साथै यात्रुहरूलाई पनि भाडा तिर्नु अघि भाडादर बारे सोधपुछ गर्न आग्रह गरिएको छ। जिल्ला ट्राफिक प्रहरी कार्यालय मोरङले यस्ता अनियमित क्रियाकलापमा संलग्न सवारी चालकहरूलाई कानूनी कारबाही गरिने चेतावनी समेत दिएको छ। प्रहरी निरीक्षक लम्सालले अनुगमनलाई निरन्तरता दिइने बताए। ‘हामीले आगामी दिनहरूमा पनि विभिन्न स्थानमा यस्तै अनुगमन गर्नेछौं,’ उनले भने, ‘यसबाट सार्वजनिक यातायात व्यवस्थापनमा अनुशासन कायम हुनेछ।’