विराटनगर, ११ चैत । मुख्यमन्त्री शेरधन राईविरुद्धको अविश्वास प्रस्तावमा हस्ताक्षर गरेका एमालेका सबै सांसदहरूले हस्ताक्षर फिर्ता लिने भएका छन् । वरिष्ठ नेता माधवकुमार नेपाल समूहका सबै सांसदले अविश्वासको प्रस्तावमा गरेको हस्ताक्षर फिर्ता लिने भएका हुन् ।
अविश्वासको प्रस्तावमा हस्ताक्षर गरेका नेपाल पक्षका सांसद तथा पूर्वसामाजिक विकासमन्त्री जीवन घिमिरेले बुधबार बसेको संसदीय दलको बैठकले सबैलाई हस्ताक्षर फिर्ता लिन निर्देशन दिएको भएपनि यसअघि नै हस्ताक्षर फिर्ता लिने सहमति भइसकेको जानकारी दिए ।
‘आजको संसदीय दलको बैठकले फिर्ता लिन निर्देशन दिएको भएपनि हस्ताक्षर फिर्ता लिने भन्ने हाम्रो सरसल्लाह भइसकेको छ,’ उनले भने,‘हस्ताक्षर फिर्ता लिने निर्णय नै भइसकेको छ ।’
नेपाल समूहका सांसद घिमिरेले बैठकमा ३२ जना मात्र सहभागी भएको विषयमा एक दिनअघि मात्र बैठकबारे जानकारी गराइएकाले कार्यव्यस्तता र सांसदहरू विभिन्न क्षेत्रमा पुगेकाले बैठकमा उपस्थित हुन नसकेको बताए ।
‘म पनि अहिले पोखरामा छु, त्यस्तै अरु साथीहरू कोही काठमाडौं, कोही पहाडतिर हुनुहोला,’ उनले भने, ‘हिजो नै सूचना गरेर आज सबै उपस्थित हुन सम्भव भएन ।’
मुख्यमन्त्री राईविरुद्धको अविश्वास प्रस्तावमा एमालेका २१ सांसदको हस्ताक्षर थियो । तीमध्ये ६ जना सांसदले हस्ताक्षर फिर्ता लिएका छन् भने अझै १५ जनाले हस्ताक्षर फिर्ता लिन बाँकी छ ।
हस्ताक्षर फिर्ता लिने निर्णयसँगै प्रदेश १ का मुख्यमन्त्री शेरधन राई नेतृत्वको प्रदेश सरकार जोगिएको छ । योसँगै उनी थप शक्तिशाली बनेका छन् । ९३ सदस्यीय प्रदेशसभा एमाले एक्लैको बहुमत अर्थात् ५१ सिट छ ।
अब प्रमुख प्रतिपक्षी कांग्रेस, माओवादी केन्द्रसहित विपक्षी दलहरू एक ठाउँमा उभिएपनि बहुमत पुग्दैन । त्यसैले प्रदेशसभामा टेबुल भएको मुख्यमन्त्री राईविरुद्धको अविश्वास प्रस्ताव स्वतः फेल हुनेछ ।
