विराटनगर । संखुवासभाको खाँदबारी नगरपालिका-९ तुम्लिङटारमा एक वृद्ध पुरुषको हत्यामा उनकै बुहारीको संलग्नता रहेको प्रहरीले खुलासा गरेको छ। ७२ वर्षीय मीनबहादुर कुमालको गत शनिबार राति आफ्नै घरको बरन्डामा सुतिरहेका बेला घाँटी थिचेर हत्या गरिएको थियो।

संखुवासभाका प्रहरी प्रमुख डीएसपी दक्षकुमार बस्नेतका अनुसार, मृतकको ४५ वर्षीया बुहारी, १२ वर्षीया नातिनी र दुई जना १७ वर्षीय किशोरलाई हत्या आरोपमा पक्राउ गरिएको छ। पक्राउ परेका आरोपीहरूलाई शुक्रबार सार्वजनिक गरिएको छ।

“बुहारीले २० हजार रुपैयाँको प्रलोभन देखाएर भाडामा मान्छे खोजेर ससुराको हत्या गर्न लगाएको प्रारम्भिक अनुसन्धानबाट खुलेको छ,” डीएसपी बस्नेतले बताए। उनका अनुसार, हत्यामा संलग्न भनिएका किशोरहरू स्थानीय रूपमा मजदुरी गर्दै आएका थिए।

प्रहरीका अनुसार हत्याको योजना बुहारी र नातिनीले बनाएका थिए। वैशाख १३ गते राति उनीहरूले दुई किशोरलाई घरमा बोलाएर मदिरा सेवन गराएपछि ससुरा बस्ने घर देखाइदिएका थिए। त्यसपछि ती दुई किशोरले मदिरामा लट्ठ भएका मीनबहादुरको घाँटी थिचेर हत्या गरेको अनुसन्धानबाट खुल्न आएको छ।

मीनबहादुरको अतितसमेत विवादास्पद रहेको प्रहरीले जनाएको छ। उनले २०५९ सालमा एक भाइ नाता पर्ने व्यक्तिको हत्या गरेका थिए भने २०७१ सालमा आफ्नै छोरामाथि खुकुरी प्रहार गरेका थिए। दुवै घटनामा जेल जीवन बिताएका मीनबहादुर पछिल्लो समयमा विदेशमा रहेका छोराको हत्या गर्ने धम्की दिँदै आएको र पत्नीको उपचारका लागि जग्गा बिक्री गर्न खोजेपछि परिवारमा विवाद बढेको प्रहरीलाई बुहारीले बयान दिएकी छिन्।

“रिस थाम्न नसकेर र भविष्यको सुरक्षाका लागि हत्या गरेको बुहारीले बयानमा उल्लेख गरेकी छिन्,” डीएसपी बस्नेतले थपे। प्रहरीले चारै जनाविरुद्ध कर्तव्य ज्यान मुद्दा चलाउन जिल्ला अदालत चैनपुरबाट म्याद थप गरेर अनुसन्धान अघि बढाएको छ।