नेकपा बैठकअघि सुरु भयो दौडधूप, महासचिव पुगे खुमलटार - News Birat

नेकपा बैठकअघि सुरु भयो दौडधूप, महासचिव पुगे खुमलटार

न्यूज विराट
काठमाडौं, २ मंसिर-नेपाल कम्युनिस्ट पार्टी (नेकपा) सचिवालय बैठकको अघिल्लो दिन नेताहरुको दौडधूप सुरु भएको छ । निर्धारित सचिवालय बैठक अनिश्चित हुने आंकलन गरिरहेकाबेला महासचिव विष्णु पौडेल कार्यकारी अध्यक्ष पुष्पकमल दाहाल ‘प्रचण्ड’लाई भेट्न खुमलटार पुगेका छन् । पौडेल अध्यक्ष एवं प्रधानमन्त्री केपी शर्मा ओलीको सन्देश बोकेर खुमलटार पुगेको निकट स्रोतको भनाइ छ ।

दाहालसहित सचिवालयका पाँच नेताको मागमा चार दिनअघि बसेको बैठक ‘तनावपूर्ण’ भएपछि ३ मंसिरसम्म स्थगित भएको थियो । गएको बैठकमा दुई अध्यक्षबीच आदानप्रदान भएका चार पत्र र दाहालको राजनीतिक प्रस्ताव अध्ययनका लागि उपलब्ध गराइएको थियो । नेताहरुलाई उपलब्ध गराएको पत्र सार्वजनिक सञ्चारमाध्यममा हुबहु प्रकाशित भइसकेका छन् ।

दुई नेताबीचको पत्रभन्दा पनि दाहालको प्रस्तावमा ओलीको गहिरो चित्त दुखाइ छ । दाहालको प्रस्तावमा आफूमाथि निराधार आरोप लगाएको भन्दै उनी क्रुद्दमात्रै भएका छैनन्, प्रस्ताव फिर्ता नभएसम्म बैठक नबस्ने र आफू सहभागी नहुने सन्देश दूतहरुमार्फत पठाइसकेका छन् ।

सचिवालय सदस्यसमेत रहेका उपप्रधानमन्त्री ईश्वर पोखरेलले ओलीको भावना प्रतिबिम्बित गर्दै ‘दुराग्रहसाथ प्रस्तुत गरिएका प्रस्ताव’ फिर्ता लिन अपिल गरिसकेका छन् । ओली निकट नेताहरु ईश्वर पोखरेल, शंकर पोखरेल र महासचिव विष्णु पौडेलले प्रस्ताव फिर्ता लिएपछि मात्रै बैठक बस्ने अडान राखिसकेकाले सचिवालय बैठक थप अनिश्चित हुने देखिएको छ ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles