विराटनगर । मोरङको कटहरी गाउँपालिकाको ५ नम्बर वडा कार्यालय आफ्नै भवनबाट संचालनमा आएको छ । सो वडाको भौंडाहामा निर्माण भएको भवनको उद्घाटन भएसंगै आफ्नै भवनबाट वडा कार्यालय संचालनमा आएको हो ।

सो ठाउँमा बुधबार आयोजित कार्यक्रमका बिच गाउँपालिकाका अध्यक्ष देवराज चौधरीले वडा कार्यालय भवनको उद्घाटन गरे । गाउँपालिकाको बजेटबाट निर्माण गरिएको वडा कार्यालयमा चार कोठा र शौचालय छ । भवन निर्माणका निम्ति एक करोडको लागत स्टिमेट भएपनि निर्माण ब्यवसायिले त्यो भन्दा निकै कममा ठेक्का कबोल गरेका थिए । विराटनगर १२ को बिलिभ इन्जिनियरिङ कन्सट्रक्सन प्रा.लि.ले भवनको निर्माण गरेको हो । बिलिभले ५९ लाख ६० हजारमा भवन निर्माणको ठेक्का लिएको गाउँपालिकाका प्रमुख प्रशासकिय अधिकृत तेजिन्द्र गौतमले जानकारी दिए ।सो अवसरमा बोल्नुहुँदै गाउँपालिका अध्यक्ष चौधरीले कटहरीका जनतालाई सहजरुपमा सेवा उपलब्ध गराउन वडास्तरमा आवश्यक वडा कार्यालय सहित स्वास्थ्य चौकी लगायतका संरचनाहरुको निर्माणलाई प्राथमिकतामा राखेर काम गरिरहेको बताए । नवनिर्मित वडा कार्यालय परिसरमा ६ कट्ठा जग्गा छ । वडा कार्यालय उद्घाटनको अवसरमा नेकपा एमालेका युवा नेता मुकेश बुढाथोकी र सुभाष सरदार सहित स्थानीयको सहभागिता थियो ।