विराटनगर । त्रिभुवन अन्तर्राष्ट्रिय विमानस्थलबाट सशस्त्र प्रहरीले चोरीपैठारीको आशंकामा १० पोका कपडा बरामद गरेको छ ।
आइतबार विराटनगर विमानस्थलबाट यति एयरलाइन्सको उडानबाट कार्गोमार्फत पठाइएको १० वटा पोकामा रहेको तयारी कपडा सशस्त्र प्रहरी बल नेपालको राजस्व अनुसन्धान विभाग हरिहर भवनमा तैनाथ राजस्व प्रहरीले नियन्त्रणमा लिएको हो । त्रिभुवन अन्तर्राष्ट्रिय विमानस्थलमा खटिएको सशस्त्र प्रहरी बल नेपालको इन्टेलिजेन्स ब्युरोको विशेष सूचनाको आधारमा सो कपडा बरामद भएको हो ।

१० पोका कपडा बरामद भएको राजस्व अनुस्न्धान विभागका सूचना अधिकारी नवराज अधिकारीले पुष्टि गरेका छन् । ‘कपडा बरामद गरेर अनुसन्धान भइरहेको छ । कसले पठाएको हो । त्यस विषयमा हामी गहन अनुसन्धान सुरु गरेका छौं,’ उनले भने, ‘बरामद गरेको बिलबिजक पनि भेटिएको छैन । यस विषयमा थप अनुसन्धानपछि भन्न सकिन्छ ।’
बरामद भएको कपडा विराटनगरमा तस्करीको धन्दा चलाउने बल्लु अग्रवालको रहेको बुझिएको छ । मोरङमा कडाइ गरेपछि उनले सुनसरीको सीमावर्ती क्षेत्रबाट तस्करीको कपडा विराटनगर गोदाममा ल्याउने र काठमाण्डौ पठाउने गरेका छन् । उनले दुई दर्जन बढी भरिया प्रयोग गरि भारतबाट अवैध रुपमा क्यारिङमार्फत कपडा ल्याउने र काठमाण्डौसहित पुर्वको विभिन्न सहरमा पठाउने गरेका छन् ।