विराटनगर । विराटनगरस्थित कोशी अस्पतालबाट एक जना कैदी फरार भएको घटनाको अनुसन्धान गर्न मोरङ प्रहरीका प्रवक्ता डिएसपी ज्ञानेन्द्र बहादुर बस्नेतको नेतृत्वमा छानविन समिति गठन भएको छ । डियुटिमा रहेका दुई जना प्रहरीलाई निलम्बन गरेर छानविन समिति बनाएको हो ।

कैदी फरार हुँदा डियुटिमा खटिएका दुई जना प्रहरीलाई निलम्बनका लागि प्रक्रिया सुरु गरिएको डिएसपी बस्नेतले बताए । ‘दुई जनालाई नै निलम्बन गरेर छानबिन गर्ने तयारी गरेका छौ,’ उनले भने‘ छानबिन पछि सबै कुरा खुल्छ । अहिले नै सबै कुरा भन्न मिल्दैन ।’ कैदी फरार हुदाँ डियुटीमा खटिएको प्रहरीको नाम भने प्रहरीले सार्वजानिक गरेको छैन ।
यस्तै कोशी प्रदेश प्रहरी कार्यालयले पनि छानबिन गरिरहेको छ । घटना शंकास्पद देखिएको भन्दै छुट्टै छानबिन गरिरहेको कोशी प्रदेश प्रहरी कार्यालयका सूचना अधिकारी एसएसपी भीम बहादुर दाहालले बताए । ‘घटना शंकास्पद रहेकाले जिल्लालाई छानबिन समिति बनाएर छानबिन गर्न निर्देशन दिएका थियौ,’ उनले भने ‘प्रदेशले पनि छुट्टै छानबिन गरिरहेको छ । सत्यतथ्य एक दुई दिनमा आइहाल्छ ।’
उपचारका लागि कोशी अस्पताल भर्ना भएका जिल्ला कारागार मोरङमा कैद सजाय भुक्तान गर्दै आएका २४ वर्षीय आर्यन मोहमद अहमद खान भनिने मोहमद अहमद बिहीबार विहान फरार भएका थिए । शौचालय जाने भनेर उनी बिहान सवा ५ बजेतिर अस्पतालबाट फरार भएकको प्रहरीले जनाएको छ ।
शौचालयबाट निस्किँदा प्रहरीलाई धकेल्दै लडाएर उनी फरार भएको जिल्ला प्रहरी कार्यालय मोरङका प्रमुख एसपी नवराज कार्कीले बताए । प्रहरीका अनुसार पेट दुख्यो भनेपछि अहमदलाई मंगलबार उपचारका लागि कोशी अस्पताल भर्ना गरिएको थियो । विराटनगर महानगरपालिका –८ घर भएका उनी भारततिर गएको हुन सक्ने प्रहरीको आशंका छ । उनको खोजी भइरहेको प्रहरीले जनाएको छ ।
जबरजस्ती करणी मुद्दामा अहमदलाई जिल्ला अदालत मोरङले २०७९ फागुन २९ गते १२ वर्ष कैद र ५ लाख जरिवानाको फैसला गरेको थियो ।अदालतको फैसला अनुसार २०९१ साल फागुन ३ गते मात्रै कारागारबाट छुट्छन् ।