११ डिसेम्बरसम्ममा अमेरिकीले कोरोना खोप पाउनसक्ने - News Birat

११ डिसेम्बरसम्ममा अमेरिकीले कोरोना खोप पाउनसक्ने

न्यूज विराट

एजेन्सी, ८ मंसिर-कोरोना भाइरसको महामारीबाट सबैभन्दा बढी प्रभावित बनेको अमेरिकाका नागरिकले ११ डिसेम्बरसम्ममा खोप पाउनसक्ने एक उच्च अधिकारीले बताएका छन् ।

अमेरिकाको कोरोनाभाइरस खोप कार्यक्रमका प्रमुख डा.मोन्सेफ स्लावीले स्वीकृति पाएको २४ घन्टाभित्र खोप पुर्‍याइने योजना रहेको बताएका हुन् ।

जोन्स हप्किन्स विश्वविद्यालयका अनुसार अमेरिकामा एक करोड २० लाखभन्दा बढी मानिस कोरोना भाइरसबाट संक्रमित भएका छन् भने दुई लाख ५५ हजार भन्दा बढीको मृत्यु भएको छ ।

फाइजर र त्यसको सहायक कम्पनी बायोएनटेकले अमेरिकामा आफ्नो खोपलाई आकस्मिक अनुमति दिन शुक्रवार आवेदन दिएका थिए । यो खोप दुई पटक लगाउँदा ९५ प्रतिशत प्रभावकारी नतिजा निस्कने देखिएको थियो ।

परीक्षणका क्रममा मानिसको प्रतिरक्षा प्रणालीलाई कोरोना भाइरसविरुद्ध सक्रिय बनाउन यो खोपमा भाइरसको आनुवांशिक संरचना आरएनएको अंश प्रयोग गरिएको थियो ।

यो खोप लगाएपछि शरीरले कोरोनासँग लड्नका लागि एन्टीबडी र टी–सेलहरू आफैं बनाउँछ । फाइजरले यो वर्षको अन्त्यसम्ममा पाँच करोड डोज खोप उत्पादन गर्ने जनाएको छ ।

अमेरिकाको खाद्य तथा औषधि प्रशासन (एफडीए) को खोपसम्बन्धी परामर्श समितिले खोपलाई अनुमति दिनेबारे १० डिसेम्बरसम्म छलफल गर्ने जनाएको छ । डा.स्लावीले सीएनएनसँगको कुराकानीमा अनुमति पाएको दुई दिनमै खोप दिन सक्नेगरी तयारी अवस्थामा रहेको जनाएका छन् ।

अमेरिकामा राज्यको जनसंख्याका आधारमा खोप वितरण गरिनेछ । स्वास्थ्य कार्यकर्ता र वृद्धवृद्धाजस्ता जोखिम समूहमा पर्नेहरूलाई प्राथमिकतामा राखेर खोप दिइने छ ।अर्को कम्पनी मोडेर्ना निर्माण गरेको खोप पनि ९५ प्रतिशत प्रभावकारी देखिएको छ ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles