विराटनगर । आगलागी पिडीतको घर निर्माणका लागि आर्थिक सहयोग गरेर नेकपा (एमाले) रंगेली नगर कमिटीले उदाहरणीय काम गरेको छ । रंगेली ३ स्थित बावुसाहेव टोलका आगलागी पिडीतको घर निर्माणका लागि ३ लाख ७५ हजार रुपैयाँ आर्थिक सहयोग गरेर एमालेले उदाहरणीय काम गरेको हो । 

बाबुसाहेव टोलका आगलागी पीडितको घर निर्माणका लागि सोही ठाउँमै पुगेर पार्टीको तर्फबाट अध्यक्ष दलबहादुर बस्नेतले रंगेली नगरपालिकाका मेयर दिलिप बगडीया र उपमेयर भूमा पराजुलीलाई सो रकम हस्तान्तरण गरे । 

रकम बुझ्दै मेयर बगडीयाले पीडित परिवारको घर निर्माणका लागि सहयोग गरेकोमा नेकपा (एमाले) रंगेली नगर कमिटीलाई धन्यवाद दिए । उनले विपदमा सवैले साथ र सहयोग गर्नुपर्ने समेत बताए । उनले एमालेले सहयोग गरेर जनताको समस्या र साथमा रहेको सावित गरेको बताउँदै अन्य पार्टी र संगठनहरुले पनि सहयोग गर्नुपर्ने बताए ।  उनले आगामी दशै वा तिहारको बिचमा निर्माण सम्पन्न गरि सवै परिवारलाई नयाँ घरमा प्रवेश गराउने प्रतिबद्धता समेत जनाए । 

नेकपा (एमाले) कोशी प्रदेश कमिटी सदस्य मनोज अग्रवालले आगलागी पिडीतको घर निर्माणका लागी पार्टी सदस्य, समर्थक एवम् शुभचिन्तकहरुबाट संकलित रकम हस्तान्तरण गरिएको बताए ।

आगलागीबाट विपस्थापित भएका विपन्न परिवारको घर पुनःनिर्माणका लागि  पार्टीको तर्फबाट संकलन गरिएको ३ लाख ६० हजार ३ सय बाबुसाहेब टोलमै पुगेर र पछि फेरी ५ नम्बर वडा कमिटी मार्फत संकलन गरिएको १५ हजार सहित कुल ३ लाख ७५ हजार रुपैयाँ रंगेली नगरपालिकालाई हस्तान्तरण गरिएको नेकपा (एमाले) रंगेली नगर कमिटी अध्यक्ष बस्नेतले जानकारी दिए । 

रकम हस्तान्तरण कार्यक्रममा मेयर बगडीयासहित नेकपा (एमाले) प्रदेश कमिटी सदस्य मनोज अग्रवाल, जिल्ला कमिटी उपसचिव सन्तोष साह, रंगेली नगरपालिकाकी उपमेयर भूमा पराजुली, रंगेली–८ का वडाध्यक्ष एवम् नगर प्रवक्ता ढक प्रसाद आचार्य, २ नम्बर वडाका वडाध्यक्ष सन्तलाल खवास, वडा नम्बर ३ का वडाध्यक्ष भरत प्रसाईँ, नेकपा (एमाले) जिल्ला कमिटी सदस्य तथा रंगेली इन्चार्ज इर्जालाल राजवंशी, हरी उप्रेती, पुनम सापकोटा, जितलाल मण्डल, नगर कमिटी अध्यक्ष दलबहादुर बस्नेतलगायतको उपस्थिती रहेको थियो ।

गत चैत ३ गते अति विपन्न सन्थाल जातीको बसोवास रहेको वावु साहेव टोलका २८ घर जलेर पूर्णरुपमा नष्ट भएको थियो । उनीहरुको पुनस्र्थापनाका लागि घर निर्माण गर्न विभिन्न व्यक्ति/संस्था/निकायले सहयोग गर्ने क्रम जारी छ । 

हाल आगलागी भएको स्थानमा २२ घरपरिवारको घर निर्माण कार्य जारी छ । एउटा घर निर्माण सम्पन्न गर्न ६ लाख ५५ हजार रुपैयाँ लाग्ने रंगेली नगरपालिकाले जनाएको छ ।