विराटनगर । हुलाकी सडक अन्र्तगत मोरङको कटहरी खण्डको निमार्ण कार्य सुस्त भएपछि स्थानीय आन्दोलनमा उत्रिएका छन् ।

उक्त सडक निमार्ण कार्यमा ढिला सुस्ती भएको भन्दै नेपाली काँग्रेस कटहरी गाउँपालिकाको अगुवाइमा यहाँका स्थानीयले एक घण्टा सडक अवरुद्ध गरेर बिहीबार आन्दोलनमा उत्रिएका हुन् ।

उनीहरुले विहान साढे ९ देखि साढे १० बजेसम्म सडकमा उभिएर कटहरी गाउँपालिका २ गोपाल फनपार्क अगाडी विरोधमा उत्रिए । आन्दोलनको कारणले एक घण्टा सवारी साधान आवगमन ठप्प भएको थियो ।
यसअघि पनि उक्त सडक तत्काल निमार्ण गरिनुपर्ने माग राख्दै नागरिक संघर्ष समितिले आन्दोलन गर्दै आएको थियो । यसअघि जिल्ला प्रशासन कार्यालय मोरङ अगाडी सडक निर्माण तत्काल गरिनुपर्ने माग राख्दै धर्ना दिएका थिए ।

हुलासी सडक समयमै निमार्ण नहुँदा झापासित साँध जोडिएको मोरङको रतुवामाई नगरपालिका, सुनवर्षी नगरपालिका, रंगेली नगरपालिका, धनपालथान र कहटरी गाउँपालिका क्षेत्रका सर्वसाधारण हिउँदमा सडकको धुलो र बर्खामा हिलोसँग पौठेजोरी खेलेर दिन कटाउन बाध्य छन् ।
राष्ट्रिय गौरवको आयोजनामा पर्ने यो हुलाकी राजमार्गको काम सुस्त छ । निर्माण सुरु भएको चार वर्ष भइसक्दा पनि पुरा हुने छाँटकाँट छैन । समयमै सडक नबन्दा स्थानीयले सास्ती भोग्नु परेको काँग्रेस कटहरी गाउँपालिका २ का वडासभापति सन्जय मण्डलले बताए । कटहरी गाउँपालिका भित्र पर्ने सडक निमार्णमा ढिला सुस्ती भएपछि आन्दोलनमा उत्रिन बाध्य हुनु परेको उनले बताए । सडक निमार्णलाई तिव्रता नदिए आन्दोलनको कार्यक्रमलाई निरन्तार दिने उनले बताए । शुक्रबार दुई घण्टा कटहरी क्षेत्रमा सडक अवरुद्ध गर्ने उनले बताए ।

सडक छेउका बासिन्दाहरूको घरमा बस्ने अवस्था नभएको मण्डलले बताए । समयमै सडक नबन्दा यहाँका स्थानीयको घरमा खानामा धुलो खान बाध्य भएको उनले सुनाए । ‘अहिले घर धुलोले छपक्कै छोपेको अवस्था छ,’ उनले भने, ‘अब पानी पर्न थालेपछि हिलोले सडक हिँडिसक्नु हुँदैन । गाडी, बाइक, साइकल केही चलाउनै नमिल्ने अवस्था हुन्छ । अनि सडक हाम्रा लागि सुविधा भयो कि सास्ती ?’
पटक–पटक काम सुरु गर्न आग्रह गर्दा काम नभएपछि आन्दोलनमा उत्रिएको उनले बताए । धुवा र धुलोका कारण सडक किनारका जनताको दैनिकी कष्टकर भएको बताउँदै उनले काम सुरु गर्न आग्रह गर्दा नटेरेपछि जनतालाई लिएर आन्दोलनमा उत्रिनु परेको स्थानीय विक्रम थपलियाले बताए । सडकको काम छाडिएका कारण पानी परेपछि बाटोमा हिँड्न सक्ने अवस्था नरहेको उनले बताए । काम सुरु नगर्ने ठेकेदारलाई कालोसूचीमा राख्नु पर्ने बताए । निमार्ण काम सुरु नगरे आन्दोलन सशक्त पारेर अगाडी बढने उनले बताए ।