विराटनगर । पोखरामा हुन गइरहेको १५ वर्षमुनिको जुनियर ब्याटमिन्टन प्रतियोगिताका लागि कोशी प्रदेशबाट खेलाडी छनौट भएका छन् ।
नेपाल ब्याटमिन्टन संघले विराटनगरमा आयोजना गरेको छनौट प्रतियोगिताबाट ८ जना खेलाडी छानिएका छन् । बिहीबार र शुक्रबार भएको छनौट प्रतियोगिताबाट ४ पुरुष र ४ महिला खेलाडी छानिएको संघका केन्द्रीय उपाध्यक्ष विनोद डाँगीले जानकारी दिए ।

पुरुषतर्फ मोरङका प्रतीक विष्ट, भोजपुरका सन्दीप राई, उदयपुरका शोषण खत्री तथा महिलातर्फ सुनसरीकी निभा राई, उदयपुरकी निताशा राइका मगर, भोजपुरकी नदिरा तामाङ र मिङमा तामाङ छनौट भएका छन् ।

नेपाल ब्याटमिन्टन संघ मोरङको व्यवस्थापकीय सहयोगमा भएको प्रतियोगिताबाट छनौट भएका खेलाडीले जेष्ठ ३० र ३१ गते पोखरामा हुने यु १५ जुनियर ब्याटमिन्टन प्रतियोगितामा कोशी प्रदेशको प्रतिनिधित्व गर्दै खेल्ने छन् । छनौट भएका खेलाडीहरुलाई कोशी खेलकुद विकास बोर्डका सदस्यसचिव कृष्ण बस्नेत, संघको केन्द्रीय उपाध्यक्ष लवभक्त श्रेष्ठ, पूर्वाञ्चल खेलकुद विकास समितिका प्रमुख शोभित प्रसाईं, ब्याटमिन्टन संघ मोरङका अध्यक्ष पुष्पधन शाक्य, उपाध्यक्ष सन्तोष बान्तवालगायतले खेलाडीहरुलाई बधाई तथा शुभकामना दिँदै मेडल र प्रमाण प्रदान गरे ।