विराटनगर । मोरङको पथरीशनिश्चरे १ की २० वर्षीय प्रतिक्षा लिम्बु म्यादी प्रहरीको आवदेन दिनका लागि लामो लाइनमा उभिएकी थिइन् । यस अघिको स्थानीय निर्वाचनमा पनि म्यादी प्रहरीको भूमिका निर्वाह गरेकी लिम्बुले अगामी मंसिर ४ गते हुने प्रतिनिधिसभा र प्रदेशसभाको निर्वाचनको लागि आहृवान गरिएको म्यादी प्रहरी भर्नाका लागि उनी दरखास्त फारम लिएर धकेलाधकेल हुने लाइनमा उभिएर आफ्नो आवदेन दर्ता गराइन् ।

आवदेन दर्ता गरेर परीक्षा कुरेर बसिरहेकी उनले अगामी निर्वाचन शान्तिपूर्ण रुपमा सम्पन्न गराउने अठोटका साथ आफुले म्यादी प्रहरीमा भर्ना हुनका लागि आवदेन दिएको बताइन् । उनीसँगै आएका थिए, उनका २२ वर्षीय श्रीमान सुमन थापा । उनी पनि पुर्व म्यादी प्रहरी हुन् । प्रतिनधी र प्रदेशसभाको निर्वाचनको लागि म्यादी प्रहरी बन्न उनले जिल्ला प्रहरी कार्यालय मोरङमा बिहीबार आएर आवेदन दिए । बेरोजगारी र घरायसी समस्याको कारण पनि आफुले म्यादी प्रहरीमा आवदेन दिएको उनले बताए । उनीहरू यस अघि स्थानिय निर्वाचनमा म्यादी प्रहरीको भूमिका निर्वाह गरिसकेको कारण फेरी पनि आफूहरूले आवदेन दिएको थापाले बताए ।

यस्तै मोरङको कानेपोखरी गाउँपालिकाकी २१ वर्षीय कोपीला पुरीले महिलाले पनि प्रत्येक कार्य गर्न सक्ने र प्रहरी संगठनमा आवद्ध भएर ज्ञान आजर्न गर्ने राम्रो अवसर रहेको कारण आफूले यस अवसरलाई छुटाउन नचाहेको बताइन् ।
‘रोजगारी छैन । घरमा बसेर के गर्नु ? । बरु म्यादी प्रहरीमा भर्ना भएपनि केही रकम पनि आजर्न हुन्छ र केही ज्ञान पनि आर्जन गर्न पाइन्छ भने हामीहरु आवदेन दिन आएका छौँ,’ कानेपोखरी ६ का श्याम तामाङले भने । प्रहरी बन्ने इच्छा रहेको कारण पनि आफुमध्ये धेरैजनाले म्यादी प्रहरीमा आवदेन दिएको उनले बताए । तामाङ यसअघि पनि स्थानीय तहको निर्वाचनमा म्यादी प्रहरीमा भर्ना भएका थिए ।

भदौ महिना सकिन लागेपनि विराटनगरको प्रचण्ड गर्मीमा मोरङका बिभिन्न ग्रामीण तथा शहरी क्षेत्रबाट म्यादी प्रहरी भर्ना हुनका लागि युवा युवतीहरु तछाडमछाड गरेर जिल्ला प्रहरी कार्यालय नजिक रहेको खुल्ला मैदानमा लाइनमा लाम लागेका छन् । प्रहरीलाई पनि लाइन व्यवस्थापन गर्न हम्मेहम्मे परेको छ । जिल्ला प्रहरी कार्यालयमा बिहीबार साझसम्म दुई हजार आवदेकले आवेदन दर्ता गराएको र आवदेन दर्ता गर्ने कार्य जारी रहेको जिल्ला प्रहरी कार्यालय मोरङले जनाएको छ ।
आवदेन दिनेहरुमा मुख्यत बेरोजगारी, पूर्व म्यादी प्रहरीको आर्कषण, प्रहरी बन्ने इच्छुक, प्रहरीसगँ काम गर्ने अवसर लगायतका कारणले म्यादी प्रहरीमा आवेदन दिनेहरु चाप बढेको मोरङ प्रहरीका प्रवक्ता डिएसपी दिपक श्रेष्ठले जानकारी दिए ।
देश भरिबाट १ लाख १५ जना म्यादी प्रहरी आवश्यक रहे पनि मोरङमा कति हुने अहिले सम्म कुनै निर्देशन नआएको जिल्ला प्रहरी कार्यालय मोरङले जनाएको छ ।

आवदेन दर्ता गराउनका लागि असोज ६ गते सम्मको म्याद रहेको छ । ४० दिने म्यादी प्रहरीले एकमुष्ट ३४ हजार ७६० रुपैयाँ पारिश्रमिक पाउनेछन् । त्यस्तै राशन बापत ७ हजार २ सय पाउनेछन् ।