काठमाडौं, चैत ५–विश्वभर महामारीको रूपमा फैलिएको कोरोना भाइरसबाट बच्न उपत्यकाका प्रहरीलाई सर्जिकल मास्क अनिवार्य गरेको छ । सो मास्क महानगरीय प्रहरी कार्यालय रानीपोखरीले मातहतका प्रहरी कर्मचारीलाई उपलब्ध गराउने भएको हो ।

उपत्यकाका ३ जिल्लामा करिब १० हजार प्रहरी कर्मचारी कार्यरत छन् । उनीहरू सबैका लागि एन–९५ नामको सर्जिकल मास्क उपलब्ध गराउन लागेको महानगरीय प्रहरी कार्यालयका प्रवक्ता प्रहरी वरिष्ठ उपरीक्षक (एसएसपी) श्याम ज्ञवालीले बताए ।

‘आजबाटै त्रिभुवन विमानस्थलमा कार्यरत प्रहरीलाई वितरण सुरू भइसकेको छ । त्यसपछि अन्य प्रहरी युनिटमा कार्यरत प्रहरीलाई पनि वितरण हुन्छ,’ एसएसपी ज्ञवालीले भने । एन–९५ मास्कको बजार मूल्य करिब ३ सयदेखि १ हजार रूपैयाँसम्म पर्ने गरेको छ ।