विराटनगर । विराटनगरस्थित मानव सेवा आश्रममा आश्रितहरुको लागि निःशुल्क आँखा जाँच तथा मोतियाविन्दु शल्यक्रिया शिविर आयोजना गरिएको छ । रोटरी क्लब अफ विराटनगर डाउनटाउन र रामलाल गोल्छा आँखा अस्पतालको संयुक्त आयोजनामा निःशुल्क शिविर आयोजना गरिएको हो ।

रामलाल गोल्छा आँखा अस्पताल विराटनगरको प्राविधिक सहयोगमा निःशुल्क आँखा जाँच तथा मोतियाबिन्दु शल्यक्रिया शिविर सञ्चालन गरिएको क्लबकी अध्यक्ष संचिता जैनले जानकारी दिइन् ।

शिविरमा मानवसेवा आश्रम विराटनगर शाखामा आश्रित सवैको निःशुल्क आँखा जाँच मात्रै नभएर आवश्यक पर्नेलाई निःशुल्क चश्मा समेत उपलब्ध गराएको थियो ।

शिविरमा मोतियाबिन्दुको समस्या देखिएका १८ जनाको रामलाल गोल्छा आँखा अस्पतालले निःशुल्क शल्यक्रिया गरेको थियो । त्यस्तै आँखाको समस्या देखिएका आँखा रोगीहरुलाई निःशुल्क औषधिसमेत उपलब्ध गराइएको क्लबले जनाएको छ ।

शिविरबाट आश्रमका ८० जना लाभान्वित भएको क्लबकी सचिव अनिता सारडाले जानकारी दिइन् ।