सुर्खेत, ६ वैशाख-शनिबार बिहान परेको हावाहुरीसहितको असिना पानीले कालिकोटको नरहरीनाथ गाउँपालिका गहुँबाली नष्ट गरेको छ । वर्षासँगै आएको असिना पानीले तरकारी, फलफूल तथा हिउँदे गहुँबालीमा ठूलो क्षति पुगेको हो ।

हावाहुरी र असिना पानीले पाक्न लागेको गहुँबाली नष्ट गरेको नरहरीनाथ गाउँपालिका–९ लालुका चिन्तन नेपालीले बताए । ‘बिहान एक्कासी हावाहुरीसहित असिना पानी पर्‍यो’ उनले भने, ‘गहुँबाली पूर्णरूपमा नष्ट भएको छ ।’

हावाहुरी र असिना पानीले गहुँबाली, तरकारीलगायतका दलहन बालीमा समेत क्षति पुगेको नरहरीनाथ गाउँपालिका–९ लालुका प्रदीप बोहोराले बताए ।

विश्वभर महामारीका रूपमा फैलिएको कोरोना भाइरसलाई न्यूनीकरण गर्नका लागि सरकारले लगाएको लकडाउनका कारण किसान पाकेको अन्नबाली घरमा भित्र्याउन नपाएको र असिना पानीले सबै गहुँबाली नष्ट गरेको सामाजिक कार्यकर्ता वीरेन्द्र बुढाले जानकारी दिए ।