प्रदेश १ का मुख्यमन्त्री राजेन्द्रकुमार राईले प्रदेशको नामकरण गर्न ढिला भएको बताएका छन् । मुख्यमन्त्री एवं मन्त्रिपरिषद् कार्यालयको सभाहलमा मंगलबार नामकरणका लागि आयोजित सर्वदलीय बैठकको सुरुवात गर्दै उनले चेतना र संख्याको हिसाबले प्रदेश अग्रणी भए पनि अहिलेसम्म नाम टुंग्याउन नसकेकामा लाज लागेको बताए ।

सरकारको कार्यकाल छोटो रहेको र प्रदेशसभाको दुईवटा अधिवेशन मात्र बाँकी रहेकाले आम जनताको माग, सवाल र चाहना एवं कामको सिलसिलामा पनि अप्ठ्यारा रहेको बताए । प्रदेशको नामकरणमा पनि चाँडै सहमति गरी टुंग्याउनुपर्नेमा उनको जोड थियो ।

स्वतन्त्ररूपमा पार्टीको धारणा आउने भएकाले छलफल गरेको बताउँदै राईले प्रदेशसभा सदस्यहरूले नामका सम्बन्धमा पार्टीको विचारअनुसार धारणा राख्ने उल्लेख गरे । नामकरणमा एकजुट हुन सबैलाई उनको आग्रह थियो ।

पहिचान, भूगोलको पहिचान र मिश्रित पहिचानका सम्बन्धमा तीन नामका विषयमा ललिचो भएर सहमतिका आधारमा दलहरूले आफ्नो दायित्व ठानेर छलफल गरी नाम टुंग्याउनुपर्ने राईले बताए । बहुदलीय व्यवस्थाको मूल मर्म सहकार्य र लचकता भएको चर्चा गर्दै राईले आवश्यक परे संयन्त्र बनाएर नियमित छलफल गरी नाममा सहमति कायम गर्न आग्रह गरे ।

छलफलमा नेपाली कांग्रेस संसदीय दलका नेता राजीव कोइरालाले नामकरण पेचिलो र जटिल भए पनि साझा सहमतिका आधारमा संघीयता र युग सुहाउँदो नामकरण गर्नुपर्नेमा जोड दिए ।

नेकपा एमाले प्रदेश कमिटी अध्यक्ष तुलसी न्यौपानेले सरकारले साझा प्रस्ताव ल्याएमा छलफल गरी नामकरण टुंग्याउन तयार रहेको बताए ।

नेकपा एकीकृत (समाजवादी) का केन्द्रीय उपाध्यक्ष घनेन्द्र बस्नेतले नामका सम्बन्धमा विविधताभित्र एकताको खोजी गर्नुपर्नेमा जोड दिए ।

नेपाली कांग्रेसका प्रदेश सभापति उद्धव थापाले प्रदेशमा बसोबास गर्ने नागरिकले अपनत्व स्वीकार गर्ने गरी नामकरण गर्नुपर्नेमा जोड दिए । हतारमा नभएर गम्भीररूपमा सुझबुझका साथ सहमति र सहकार्यका साथ निर्णय गर्नुपर्ने उनको भनाइ थियो ।

नेकपा (माओवादी) केन्द्रका हर्क नेम्वाङले पहिचानलाई विशेष महत्व दिएर छलफल गर्न जोड दिए । यथाशीघ्र प्रदेशको नाम दिनुपर्ने उनको भनाइ थियो ।

जनता समाजवादी नेपालका प्रदेश उपाध्यक्ष राजकुमार यादवले पार्टीका तर्फबाट पहिचानको आधारमा प्रदेशको नाम किराँत–लिम्बुवान, मधेस– शेपालुङ हुनुपर्ने बताए ।

संघीय लोकतान्त्रिक राष्ट्रिय मञ्चका केन्द्रीय अध्यक्ष कुमार लिङ्देनले संघीयताको आधार पहिचान हुनुपर्ने भन्दै सहमतिको आधारमा नामकरण गर्न आग्रह गरे ।

एकीकृत (समाजवादी) का प्रदेश अध्यक्ष बलदेव चौधरीले पहिचान, भूगोल र भाषा संस्कृतिका  आधारमा सबैलाई मान्य हुने नामकरण गर्नुपर्नेमा बताए ।

स्वास्थ्यमन्त्री जयराम यादवले सरकारले आफ्नो संयोजकत्वमा सर्वदलीय छलफलको आयोजना गरी प्रदेशको नामकरण टुङ्ग्याउन जिम्मेवारी दिएको बताए । सोहीअनुसार छलफल सुरु भएको चर्चा गर्दै यादवले आगामी दिनमा दलहरूबीच अझ विस्तृत र गहनरूपमा सहमति कायम गरी नाममा सहमति हुने विश्वास व्यक्त गरे ।