विराटनगर, २८ माघ । राष्ट्रिय प्रजातान्त्रिक पार्टीबाट अलग भएको घोषणा गरेका कमल थापाले

फागुन पहिलो साताभित्रै नयाँ पार्टी गठन गर्ने तयारी गरिरहेको बताएका छन् । राप्रपाबाट अलग भएको घोषणा गरेका थापाले शुक्रबार विराटनगरमा शुभचिन्तकले नया पार्टी गठन गर्न सुझाव दिएकोले सोहीअनुसार अघि बढ्ने बताए ।

‘साथीहरूले नयाँ पार्टी गठन गरेर अघि बढ्न मलाई जिम्मेवारी दिनुभएको छ । गृहकार्य सुरु गरिसकेको छु,’ थापाले भने, ‘फागुनको पहिलो हप्ताभित्रमा निर्वाचन आयोगमा कानुनबमोजिम नयाँ पार्टी दर्ता गर्नेछु ।’

नयाँ पार्टीको एजेण्डा हिन्दु राष्ट्र, सुशासन र समृद्धि हुने थापाले बताए । राप्रपामा निरीह, लाचार र अपमानीत भइ बसिरहन नसकेकाले अलग हुने निर्णय लिएको उनको भनाइ थियो ।

‘राजनीतिबाट शन्यासमा जाने अनुमति मलाई छैन । एउटा विचार बोकेर हिँडेको व्यक्ति हुँ,’ थापाले भने, ‘त्यसैले राप्रपा विभाजन नगरीकन नयाँ पार्टी गठन गर्ने उद्देश्यले पार्टीबाट अलग हुने निर्णय लिएको हुँ ।’

अब आफूले राजसंस्थाको एजेण्डा नबोक्ने उनले संकेत गरे । संवैधानिक राजसंस्था हुनुपर्छ भन्ने आफ्नो मान्यता रहे पनि राजसंस्थाको भूमिकामाथि व्यापक प्रश्न उठेको थापाले बताए ।