बुटवल, १ वैशाख-भारतसँग सिमाना जोडिएको रुपन्देही जिल्लामा लुकीछिपी आवतजावत रोक्ने सीमा क्षेत्रमा उच्च निगरानी बढाइएको छ ।पछिल्लो समय भारतमा कोरोना संक्रमितको संख्या बढ्दै गइरहेका बेला सिमाबाट हुन सक्ने लुकिछिपी आवतजावतलाई कम गर्न उच्च निगरानी राखिएको हो । अहिले सीमा क्षेत्रमा सुरक्षा व्यवस्था कडा पारिएको छ । सीमा क्षेत्रमा नेपाल प्रहरी, शसस्त्र प्रहरीले २४ घण्टे सुरक्षा दिइरहेका छन् ।

पैदल मार्ग हुँदै भारतीय भित्रिन सक्ने भएकाले प्रशासनले सीमामा ‘हाई अलर्ट” निगरानी बढाएको हो । रुपन्देहीको सेमरपानी, भगवानपुर, मैनिहवा, अमवा, बुची बरवा, मदरी, भगवानपुर, मर्चवारको खैरा ठोठरी, कदम्हवा, पैसिया, चन्नी, थुम्हवा बाट मानिसहरूको आवातजावत हुने गर्दछ । त्यस्तै, लुम्बिनीको ककरहवा लगायतका सीमावर्ती नाकाबाट भारतीय बजारमा नेपालीको आवतजावत बढी हुने गर्छ ।

सीमा क्षेत्रमा पर्ने अहिले सबै स्थान शिल गरिएको छ । सशस्त्र प्रहरी बल २७ नं गणका प्रहरी उपरीक्षक लेज पोखरेलले सीमा क्षेत्रमा भएको बाटो, गोरेटो, पुलहरू सबै शिल गरिएको जानाकारी दिए ।