विराटनगर । विराटनगरका दुई जना पत्रकार सम्मानित भएका छन् । नेपाल क्षयरोग निवारण संस्थाले विराटनगरका नविन कर्ण र सुशिला पाठकलाई सम्मान गरेको हो ।

शनिवार विराटनगरमा आयोजित संस्थाको ५३ औं जिल्ला सभाकाबीच कर्ण र पाठकलाई सम्मान गरिएको छ । कोशी प्रदेशका मुख्यमन्त्री हिक्मत कार्की र आयोजक संस्थाका अध्यक्ष शिवनारायण प्रधानले दुवैजनालाई सम्मान पत्र,दोसल्ला र जनही नगद १० हजार १ सय सहित सम्मान गरे ।

क्षयरोग नियन्त्रण कार्यक्रममा पत्रकारिताको माध्यमबाट पु¥याएको योगदान तथा कार्यक्रमका सन्देशलाई बृहत समुदाय समक्ष पु¥याउन लामो समयदेखी खेलेको भुमिकाको कदरगर्दै कर्ण र पाठकलाई सम्मान गरिएको आयोजक संस्थाका अध्यक्ष प्रधानले जानकारी दिए । कार्यक्रममा मुख्यमन्त्री कार्कीले बिगतमा निकै डरलाग्दो रोगका रुपमा चिनिएको क्षयरोग निरन्तरको खोज अनुसन्धानपछि पछिल्लो समय सामान्य संक्रमणको रुपमा लिईने अवस्थामा पुगेको बताए । उनले यसक्षेत्रमा क्षयरोग न्युनिकरणमा नेपाल क्षयरोग निवारण संस्था मोरङले खेलेको भुमिकाको प्रशंसा समेत गरे ।

मुख्यमन्त्री कार्कीले रोग न्युनिकरणमा मोरङ शाखाको भुमिका उल्लेखनिय रहेपनि संस्था भने उपेक्षामा परेको बताए । उनले संस्थाले जग्गाको बन्दोबस्त गरे प्रदेश सरकारले संस्थाको भवन निर्माणमा सहयोगगर्ने आश्वासन समेत दिए ।
कार्यक्रमकाबीच संस्थामा कार्यरत ल्याब टेक्निशियन अमृत चौधरी र एक्सरे टेक्निशियन ध्रवराज थापालाई उत्कृष्ठ कर्मचारी पुरस्कारबाट पुरस्कृत गरिएको थियो । यस्तै संस्थाकै सुरक्षा गार्ड मानबहादुर पुरीलाई तोरेन्द्र–ईन्दिरा सेवा पुरस्कारबाट पुरस्कृत गरिएको संस्थाका सचिव टिकाराज ढकालले जानकारी दिए । सोही अवसरमा कोशी प्रदेश जनस्वास्थ्य प्रयोगशाला र स्वास्थ्य कार्यालय मोरङका क्षयकुष्ठ अधिकृत मुलकचन्द राजवंंशीलाई संस्थागत सम्मान प्रदान गरिएको थियो ।