विराटनगर, २२ माघ । सुनसरीमा गएराति भएको सडक दुर्घटनामा तीन जनाको मृत्यु भएको पुष्टि भएको छ । सुनसरीको कोशी गाउँपालिका–१ लौकहीस्थित खुनिया खोला पुलमा गए राति बस र ट्रक एक अपसमा ठोक्किएर आगलागी हुँदा तीन जनाको मृत्यु भएको पुष्टि भएको हो ।

मृत्यु हुनेमा बसका चालक झापा गोलधापका सरोज राई, बसचालक पछाडीको सिटमा बसेका भारत पश्चिम बंगलको कालचिनीका नेहाल प्रधान र ट्रक चालक निजगढ बाराका शेख फारुक रहेको जिल्ला प्रहरी कार्यालय सुनसरीका प्रवक्ता प्रहरी नायव उपरिक्षक नरेन्द्र बहादुर कार्कीले जानकारी दिए ।

पश्चिमबाट पूर्व तर्फ आँउदै गरेको ना ५ ख २९९६ नम्बरको सिमेन्ट बोकेको ट्रक र पूर्वबाट पश्चिमतर्फ जाँदै गरेको ना ८ ख ८४९३ नम्बरको यात्रुवाहक बस आपसमा जुधेर आगलागी भएको थियो ।

ट्रक र बस एक आपसमा ठक्कर खाँदा ब्याट्री सट भएर आगलागी भएको प्रवक्ता बहादुर कार्कीले बताए । ‘पश्चिमतिर गइरहेको बस र पूर्वतर्फ आउँदै गरेको ट्रक हाइवेमा जुधेर सर्ट हुँदा आगो लागलागि भएर तीन जनाको मृत्यु भएको देखियो । दुइ जना ड्राइभर र एक जना बस चालकको पछाडी बसेका यात्रुमो डेथ भयो ।’ उनले भने,‘शव बीपी प्रतिष्ठान पठाएका छौँ । राति बस र ट्रक क्रेनले तानेर आगो नियन्त्रणमा लियौँ ।’

उनले आगो नियन्त्रणमा लिएपछि राति साढे १० बजे मात्रै सडक सुचारु गरिएको बताए । सो दुर्घटनामा परि २७ जना घाइते भएका छन् । सामान्य घाइतेहरु उपचारपछि घर फर्किएको र गम्भिर चोटपटक लागेका १० जना घाइतेको विराटनगरस्थित न्यूरो र नोबेल शिक्षण अस्पतालमा उपचार भइरहेको प्रवक्ता कार्कीले जानकारी दिए ।