विराटनगर, २९ जेठ । मोरङ र सुनसरीका बाँतर(सरदार) समुदायका कोरोना संक्रमित परिवारलाई शनिबार राहत वितरण गरिएको छ । नेपाल बाँतर सरदार कल्याणकारी केन्द्रीय समिति कटहरीको सहयोगमा कोरोना संक्रमित परिवारलाई स्वास्थ्य सामाग्री, खाद्यान्नसहित राहत वितरण गरिएको हो ।

बाँतर (सरदार) समुदायका कोरोना संक्रमित परिवारलाई नेपाल बाँतर सरदार कल्याणकारी केन्द्रीय समिति, जिल्ला कार्य समिति मोरङ र युवा कार्य समिति मोरङले मोरङ र सुनसरीका ५० परिवारलाई प्रती परिवार तीन हजार रुपैयाँ मुल्य बराबरको राहत सामाग्री वितरण गरेका हुन् ।

कोरोना संक्रमणका कारण पीडीत बाँतर(सरदार) समुदायको प्रती परिवार राहत स्वरुप २५ केजी चामल, तीन केजी भुजा, एक क्यारेट अण्डा, एक लिटर खाने तेल, एक केजी दाल, आधा केजी च्यावनप्रास, एक प्याकेट माक्स, एक बोतल स्यानिटाइजर र एउटा साबुन सहितको राहत वितरण गरिएको नेपाल बाँतर सरदार कल्याणकारी केन्द्रीय समितिका सचिव सुभाषकुमार सरदारले जानकारी दिए ।

राहत नेपाल बाँतर सरदार कल्याणकारी केन्द्रीय समितिका अध्यक्ष मोहनलाल सरदार, सचिव सुभाषकुमार सरदार, जिल्ला अध्यक्ष गयानन्द सरदार, सचिव सुरेसकुमार सरदार, नेपाल बाँतर सरदार कल्याणकारी जिल्ला युवा समिति मोरङका अध्यक्ष अनिलकुमार सरदार, सचिव विनोद सरदार, सह–सचिव सुरतलाल सरदार, सदस्य धर्मेन्द्र सरदारलगायतले कोरोना संक्रमित परिवारको घर–घरमै पुगेर राहत वितरण गरेका हुन् ।