कोरोना उपचार निःशुल्क गर्न नीजी अस्पताललाई मुख्यमन्त्री राईको निर्देशन - News Birat

कोरोना उपचार निःशुल्क गर्न नीजी अस्पताललाई मुख्यमन्त्री राईको निर्देशन

न्यूज विराट

विराटनगर, १२ मंसिर-प्रदेश नं १ का मुख्यमन्त्री शेरधन राईले कोरोना संक्रमितको उपचार निःशुल्क गर्न विराटनगरका विभिन्न अस्पतालहरुलाई निर्देशन दिएका छन् । विभिन्न तीन निजी अस्पतालको अनुगमनका क्रममा संक्रमितका आफन्तले अस्तालहरुले उपचारका नाममा चर्को शुल्क अशुल गर्ने गरेको गुनासो गरेपछि मुख्यमन्त्री राईले निःशुल्क गर्न निर्देशन दिएका हुन् ।

मुख्यमन्त्री राई र सामाजिक विकास मन्त्री जीवन घिमिरेले शुक्रबार मोरङ जिल्लामा निजी क्षेत्रबाट सञ्चालित तीन कोभिड अस्पतालको अनुगमन गरेका छन् । नागरिकले निजी क्षेत्रको अस्पतालबाट कोरोना संक्रमित विरामीहरुले उपचार नपाई अनाहकमा मृत्यु हुने, निःशुल्क उपचार गर्नुपर्नेमा अत्याधिक शुल्क लिने, धरौटी रकम राख्नु पर्ने लगायतका गुनासा आएकोले अनुगमन गरिएको हो ।

अनुगमनको क्रममा मुख्यमन्त्री राई समक्ष मोरङको वुढीगंगा गाउँपालिकास्थित विराट शिक्षण अस्पतालमा कोरोना संक्रमित विरामीका आफन्तले ८ मंसिर अघिसम्म ३ लाख रुपैयाँसम्म धरौटी राख्नु पर्ने, सरकारको तोकेको भन्दा ज्यादा साधारण , सघन उपचार कक्ष तथा भेन्टिलेरमा उपचार गराउंदा १५ हजारदेखि ३० हजार रुपैयाँसम्म दैनिक तिर्नुपरेका गुनासो व्यक्त गरेका थिए ।

भोजपुर हतुवागढी–४ का राजकुमार राईले आफ्नो फुपु संक्रमित भएको र उपचारका लागि अस्पताल ल्याउँदा शिक्षण अस्पतालले तीन लाख धरौटी माँग गरेकोमा भनसुनवाट ५० हजार रुपैयाँ धरौटी राखेको मुुख्यमन्त्री राईलाई जानकारी गराए । सो अवसरमा मुख्यमन्त्री राईले अस्पताल प्रशासनलाई संघीय सरकारको नीति अनुसार ३ मंसिरदेखि निजी क्षेत्रको कोभिड अस्पतालले संक्रमित विरामीको उपचार निशुल्क गर्न निर्देशन दिए ।

उनले ‘म आफै उपचार गर्छु’ भन्ने वाहेक संक्रमितको उपचार खर्च नेपाल सरकारले भुक्तानी दिने भएकाले सवैको उपचार निःशुल्क गर्न निर्देशन दिएका हुन् । मुख्यमन्त्री राईले महामारीको यस समयमा कोरोनो नियन्त्रण, रोकथाम गर्नुसवैको कर्तव्य भएको बताउँदै नागरिकलाई अकाल मृत्युबाट जोगाउन सरकारले उपचार सेवालाई सहज र निःशुल्क बनाएकाले सोही अनुसार गर्न अस्पतालहरुलाई निर्देशन दिए ।
उनले विरामीका आफन्तबाट आएका गुनासा सम्वन्धीत अस्पताल, जिम्मेवार पक्ष र प्रशासनसँग वसेर छलफल गरी सम्वोधन गर्ने बताए ।
सामाजिक विकास मन्त्री जीवन घिमिरेले संघीय सरकारको प्रोटोकल अनुसार निजी क्षेत्रको कोभिड अस्पतालले नागरिकलाई निशुल्क उपचार सेवा उपलव्ध गराउन निर्देशन दिए । उक्त अवसरमा विराट शिक्षण अस्पतालका निर्देशक डा.ज्ञानेन्द्र कार्कीले नेपालको सरकारको परिपत्र अस्पष्ट रहेको हुनाले सक्षम वाहेक गरीव, असहायलाई स्थानीय निकायको पत्र अनुसार ८ मंसिरदेखि निःशुल्क उपचार सेवा दिइरहेको दावी गरे ।
उनले कोभिड संक्रमित उपचारमा खट्ने चिकित्सकको मासिक दुई लाख २० हजार र स्टाफ नर्सलाई एक लाख २८ हजार रुपैयाँ तलव भुक्तानी दिएको बताउदै सेवा अनुसार सरकारबाट पाउने रकम न्यून भएको गुनासो गरे ।

मुख्यमन्त्री राईले विराटनगर–४ स्थित नोबेल शिक्षण अस्पताल र विराटनगर–९ स्थित न्यूरो अस्पताल को पनि निरीक्षण गरेका छन् । अनुगमनको क्रममा मुख्यमन्त्री समक्ष विरामीका आफन्तले नोबेल अस्पतालको सघन कक्षमा विरामी भेट्न जाँदा प्रत्येक पटक २ हजार रुपैयाँ मूल्य बरावरको पिपीइ लगाउनु पर्ने प्रावधान राखेको र चिकित्सकबाट गुणस्तरीय सेवा सुविधा नपाएको गुनासो गरे ।

नोबेल अस्पतालले कोभिड विरामीसँग दैनिक २० हजार रुपैयाँ उपचार खर्च लिने गरेको छ । सो अवसरमा नोबेल अस्पतालका प्रवन्धक राजेश नेपालले संघीय सरकारको निःशुल्क उपचारका लागि पत्र नआएकाले शुल्क लिएको बताए । त्यसैगरी न्यूरो कोभिड अस्पतालले संक्रमित विरामीको उपचारका लागि दैनिक ३० हजार रुपैयाँ उपचार सेवा लिएरहेको अस्पतालमा उपचार गराइरहेका विरामीका आफन्तले बताएका छन् । सामाजिक विकासमन्त्रालयका सचिव गोविन्दवहादुर कार्कीले संक्रमितको उपचार खर्च सरकारले व्यहोर्ने भएकाले अविलम्व निःशुल्क उपचार सेवा प्रवाह हुनुपर्ने बताएका छन् ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles